Komandante Polísia Munisípiu Dili, Superintendente Xefe Hendrique da Costa. Imajen/Eugénio Pereira

DILI, 13 jullu 2020 (TATOLI)- Komandante Polísia Munisípiu Dili, Superintendente Xefe Hendrique da Costa, informa, Servisu Informasaun Polísia (SIP) no Ofisiál Polísia Suku (OPS) koordena ona ho autoridade sira hodi buka tuir autór ida ne’ebé lori rama ambon hana vítima Agostinho da Silva, tinan 30, iha área Hodi-Laran, Suku Bairru-Pité, Dili, segunda kalan (13/07).

Kazu hana vítima Agostinho ne’ebé hela iha área Ai-Mutin, Dili, akontese bainhira vítima lori fo’er hosi loja Xineza nian  ida ne’ebé pertense ba vítima nia servisu fatin atu ba soe.

“Dezde horikalan to’o ohin ne’e polísia halo operasaun iha fatin hotu- hotu inklui área Hodi-Laran nian hodi buka tuir autór sira-ne’e,” informa Superintendente Xefe Hendrique da Costa, ba jornalista iha Dili.

Bainhira akontesimentu ne’e, PNTL koordena kedas ho ambulánsia hodi transporta vítima ba Ospitál Nasionál Guido Valadares (HNGV) hodi hetan tratamentu intensivu no halo operasaun hodi hasai rama ambon ne’ebé metin hela iha vítima nia kotuk laran parte liman kuana nian.

Informasaun ne’ebé vítima transmite ba  autoridade Polísia katak nia la koñese  ema deskoñesidu ne’ebé hana nia ho rama ambon tanba depois autór sira hana nia halai kedas ho motor.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here