Sesaun Plenária Iha Parlamentu Nasionál. Imajen /Egas Cristovão

DILI, 14 jullu 2020 (TATOLI) – Parlamentu Nasionál (PN) adia hikas diskusaun no votasaun finál global ba projetu lei númeru 1/V/I-Medida Prevensaun no Kombate Korrupsaun (MPCC) ka lei Anti-Korrupsaun.

Notísia Relevante : Dispozisaun Jerál Lei Antí Korrupsaun Hotu Tiha Ona

Tuir ajenda Plenária Parlamentu Nasionál, ohin, iha tuku 15:00 Otl, halo diskusaun no votasaun finál global ba projetu lei refere, maibé la konsege adia hikas fila-fali ba segunda (20/07/2020).

Tuir informasaun ne’ebé Agênsia Tatoli asesu katak, razaun ba adiamentu ne’e tanba Prezidente Parlamentu Nasionál (PPN), Aniceto Longuinhos Guterres, hafoin simu relatóriu hosi Komisaun A kona-ba projetu lei ne’e ne’ebé hetan ona aprovasaun iha nivel espesialidade komisaun A hodi halo leitura haree katak, presiza haree fila-fali, kona-ba kestaun téknika no aditamentu ba artigu balun no halo armonizasaun nia estrutura.

Membru Komisaun A Parlamentu Nasional,  Antonio Nobre, hateten, ho razaun hirak ne’e PPN haruka fila-fali projetu lei refere ba Komisaun A hodi haree fila-fali liu iha artigu ida ne’ebé hateten kona-ba Prezidente Repúblika, membru Governu no Deputadu sira kuandu komete krime nia labele eleitu fila-fali ba kargu iha tinan-lima  to’o 10, tanba atu eleitu ne’e iha konstituisaun hakerek ona nune’e presiza armonia.

Tuir nia haree, iha artigu seluk kona-ba deklarasaun bens movies ba kargu públiku hotu-hotu, tanba antes ne’e utiliza iha dispozisaun tranzitóriu presiza armonia bainhira lei ne’e aprova fó kompeténsia ba Komisaun Anti-Korrupsaun (CAC) bele halo rejistu.

“Ho razaun hirak mak adia diskusaun no votasaun final globál tanba ne’e iha semana ne’e nia laran sei hadi’a no halo armonizasaun ba artigu sira ne’e inklui kestaun tékniku ho estruturasaun,” informa Deputadu Antonio Nobre iha PN

Enkuantu projetu lei númeru 1/V/I-Medida Prevensaun no Kombate Korrupsaun ne’ebé ho títulu hamutuk tolu (III), Primeiru (I) kona-ba medida preventiva kombate korrupsaun, Segundu  (II) kona-ba Dispozisaun Kriminál no Terseiru (III) kona-ba Dispozisaun Finál ho artigu hamutuk 120.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here