Arguido, Gastão Sousa,eis-Ministru Obras Públiku. Imajen/Dok

DILI, 13 jullu 2020 (TATOLI) – Tribunál Distritál Dili (TDD), liuhosi desizaun final ba re-julgamentu kazu eis Ministru Obras Públika (MOP) Gastão de Sousa ho arguidu Diogo da Costa (eis xefe gabinete MOP) ho pena prizaun fulan-neen  (6) no suspende ba fulan-neen (6) hosi kazu pekulatu uzu.

Notísia Relevante : Testemuña Xanana “Karreta Hela Ho Gastão, La’ós Pertense Ba Nia”

Iha fulan hirak liubá TDD liuhosi desizaun primeira instánsia deside kondena arguidu na’in-rua (Gastão ho Diogo)  ho pena prizaun fulan-neen (6) no  suspende ba fulan-neen (6), tanba ho faktu provadu katak komete krime pekulatu uzu tanba utiliza veíkulu ne’ebé hetan apoiu parseiru nian hasai hodi tau xapa matrikula privadu nune’e mós utiliza mina ba interese privadu.

Parte defeza la konkorda ho desizaun primeira instánsia nian, nune’e halo rekursu ba Tribunál Rekursu (TR) hodi TR haree fila-fali iha aktu balun ne’ebé iha hodi husu Tribunál Distritál Dili presiza haree fila-fali, nune’e halo re-julgamentu iha primeira instánsia ba prosesu ne’e. Tanba ne’e liu hosi prosesu re-julgamentu ba leitura akórdaun Tribunál nian, ohin, kontinua kondena arguidu Gastão de Sousa ho Diogo da Costa, krime pekulatu uzu ho nia alterasaun utiliza mina tau ba karreta uza ba interese privadu.

Tuir entendimentu Tribunál nian aplika pena prizaun fulan-neen  no suspende ba fulan-neen, signifika katak arguidu na’in-rua durante fulan-neen nian laran labele komete tan aktu krime seluk, kuandu komete mak sei hetan pena prizaun efetivu fulan-neen.

Tribunál  mós absolve arguidu Jordão Maria de Jesus de Sousa (Gastão de Sousa nia oan) no Ferlio Afonso Badoloi da Silva Sousa  (Gastão nia oan mós) hosi akuzasaun krime administrasaun danoza kontra artigu 274,no 2 ho 3 ba kumplisidade ho arguidu Martinho Gusmão, (atuál Padre no Dosente Filózofu) ne’ebé antes ne’e Ministériu Públiku imputa ba arguidu hirak ne’e tanba faktu la provadu.

Defeza Eustáquio Guterres ne’ebé fó asisténsia ba arguidu hateten, desizaun Tribunál nian ne’e ladún justu no laiha mudansa tanba ho deklarasaun arguidu no sasin sira nian iha julgamentu sira liu-ba ho parsialmente katak utilizasaun veíkulu no mina la’ós uza ba iha privadu, maibé uza ba servisu públiku tanba ne’e la nesesáriu ho pena refere.

Eustáquio Guterres sei halo rekursu dala ida tan, dentru loron-15 (sura hosi akórdaun desizaun Tribunál nian).

Tuir akuzasaun Ministériu Públiku (MP) nian katak iha 28 fevereiru 2010, Governu RDTL asina akordu ho Banku Dezenvolvimentu Aziátiku (ADB-sigla Ingles) hodi hala’o projetu finansiamentu ho montante orsamentu $46.000.000.

Projetu ne’e atribui ba fundu reabilitasaun no konstrusaun estrada Liquiça no Batugade. Projetu refere remata iha tinan 2012 no tenke entrega fila- fali osan ne’ebé la utiliza ho montante$82.776,77 inklui viatura hamutuk ualu (8).

Entre viatura hirak ne’e, Ministériu Obras Públiku (MOP) simu viatura rua, ho xapa matrikula 18-948 TLS ho marka Toyota Land Cruiser no viatura ho xapa matrikula 19-754 TLS ho marka Toyota Kijang Innova no entrega ba arguidu Diogo da Costa nu’udar Xefe Gabinete iha MOP. Maibé, realidade fó koñesimentu de’it ba viatura rua seluk ho xapa matríkula 18-723 TLS ho marka Toyota Rav4 no viatura ho xapa matríkula 18-947TLS ho marka Toyota Land Cruiser Prado.

Hafoin simu viatura hirak ne’e, tuir instrusaun verbal hosi arguidu Gastão de Sousa la fó koñesimentu ba Departamentu Lojístika iha MOP kona-ba simu viatura hirak ne’e.

Konkordánsia no kolaborasaun hirak ne’e ho intensaun hodi oinsá bele halakon rejistu viatura rua ne’e, hanesan patrimóniu Estadu nian.

Iha 24 setembru 2012, arguidu Gastão de Sousa komunika ba ADB kona-ba nia desizaun atu atribui viatura rua ho xapa matríkula 18-948 no 19-754 ba Unidade Jestaun Projetu nian, inklui manutensaun no abastesimentu kombustivel ne’ebé finansia hosi ADB, maibé realidade mak viatura ho xapa matríkula 18-948 rai hela iha arguidu Gastão de Sousa nia rezidénsia iha Aldeia Bekusi kraik, Suku Becora.

Arguidu Gastão de Sousa mós permite nia oan nain-rua hanesan arguidu Jordão Maria de Jesus Sousa no Ferlio Afonso Badoloi Sousa, utiliza viatura refere ba títulu privadu no falsifika motorista nia asinatura hodi enxe mina iha Tiger Fuel no uza paseiu iha sidade Dili laran.

Arguidu Gastão de Sousa mós permite arguidu Diogo da Costa halo manutensaun dala rua ba karreta ho xapa matrikula 18-948 uza osan ADB nian.

Arguidu Padre Martinho G. da Silva Gusmão.

Iha data ne’ebé la apura iha maiu 2014, arguidu Martinho G. da Silva Gusmão hato’o pedidu verbalmente ba arguidu Gastão de Sousa hodi husu ajuda viatura ida ba preparasaun serimónia komemorasaun tinan 200 Parókia Manatuto nian no loron 13 maiu 2014, arguidu Gastão de Sousa entrega parsialmente viatura ho xapa matríkula 19-754 TLS ne’ebé uza hela ba títulu privadu hosi arguidu Diogo da Costa.

Arguidu Martinho G. da Silva Gusmão utiliza viatura refere durante tinan-ida, fulan-tolu  no bainhira uza viatura refere
arguidu Martinho Gusmão husu dala rua ba arguidu Gastão de Sousa hodi halo manutensaun ba viatura ne’e ho fundu hosi ADB ho montante $532.34.

Bazeia ba akuzasaun hirak ne’ebé iha konsidera katak bens no ekipamentu hirak ne’e uza pertensia ba Estadu, mezmu nune’e arguidu sira aproveita patrimóniu públiku ba benefísiu privadu.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here