Mákina perfurasaun mina-matan Drilling Rig to’o iha Suai husi EUA. Imajen/Timor Resources Pty.Ltd.

DILI, 13 jullu 2020 (TATOLI) – Maski situasaun surtu COVID-19 iha Timor Leste, maibé Kompañia Timor Resources Pty.Ltd, husi Austrália ne’e nafatin hatudu kompromisu hodi halo perfurasaun mina-matan lima iha rai-maran iha Kosta Súl, área Suai no Manufahi.

“Ami nafatin iha kompromisu no prontu atu halo perfurasaun mina-matan sira ne’e, maibé ho situasaun pademia globál hanesan COVID-19 ne’e mak afeta oituan, tanba ne’e sei adia loron instalasaun no perfurasaun ne’e,” tenik Diretór Operasaun Kompañia Timor Resources Pty.Ltd, Luís Pereira  ba Agência Tatoli via telefónika, segunda ne’e.

Nia haktuir, daudaun ne’e empreza australiana ne’e monta hela ekipa seguransa no manutesaun iha terrenu atu kontinua hein mákina sira ne’e to’o inklui enjeñeiru sira husi Indonézia, Amérika, Nova Zelándia no Austrália atu halo instalasaun no perfurasaun.

“Timor-Leste iha relasaun di’ak hela ho parseiru sira tanba ita iha Timor-Gap nu’udar Empreza Públika Estadu, maibé problema mak sira husi nasaun estranjeiru atu mai ne’e maka ladiak tanba ho situasaun surtu COVID-19 ne’e. Ita hakarak sira mai atu serbisu kedan no la presiza ba fali kuarentena, maibé labele,” nia subliña.

Tuir planu, Empreza Timor Recourses hakarak hala’o foku uluk ba posu dahuluk ho naran Karau ne’ebé lokaliza iha Suku Matai, Postu Administrativu Maucatar, Munisípiu Covalima, hafoin mak muda fali ba posu daruak lokaliza iha Aldeia Sanfuc, Suku Camenaça, Postu Administrativu Suai Villa, Munisípiu Covalima.

Antes ne’e, Vise-Prezidente Autoridade Nasionál Petróliu no Minerál (ANPM) ba asuntu Esplorasaun Minerál, José Gonçalves, informa iha inísiu abríl nia-laran, Kompañia Timor Resources ho ninia parseiru Timor GAP sei hahú preparasaun ba perfurasaun mina-matan lima iha rai-maran, iha área Kosta Súl, área Suai, Betano, no Manufahi nian.

Parte autoridade kontinua akompaña nafatin atividade kompañia sira iha terrenu tanba antes halo perfurasaun iha ona peskiza jeofízika ho sistema sízmiku no magnétiku ne’ebé ekonomikamente no téknikamente viável atu halo perfurasaun.

Ho nune’e, nia iha esperansa molok tinan-2020 nia rohan bele hetan ona novidade di’ak kona-ba rezultadu perfurasaun hodi bele prepara dezenvolve kampu.

Kompañia Timor Resources sei halo perfurasaun ba mina-matan iha rai-maran área Betano no Manufahi iha bloku lima.

Atividade iha bloku hirak ne’e hahú ona iha tinan-2017, ho peskiza jeolójiku no estudu sira seluk no iha outubru 2018 hala’o ona teste sízmiku sira iha Bloku A.

Empreza uza ona sistema vibroseis, ne’ebé hanesan alternativu ida kontroladu hosi teste sízmiku sira.

Sistema ne’e hanesan alternativu ida kontroladu hosi teste sízmiku, enkuantu bloku C hala’o ona teste sira iha outubru iha zona Betano (entre Alas ho Hatudu) no halo teste vibroseis.

Planu atuál haree ba perfurasaun tolu to’o lima iha bloku A no ida-idak hosi perfurasaun tolu iha shallow-field to’o metru 2.000 no ho kustu millaun $35.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here