DILI, 13 jullu 2020 (TATOLI) – Sentru Formasaun Jurídika no Judisiál (CFJJ-sigla portugés) sei loke vaga 45 ba Timoroan ne’ebé lisensiatura iha area direitu hodi tuir kursu ba juiz, prokuradór no defensór públiku.
Notísia Relevante : SFJJ Kontinua Fó Formasaun Lian Portugés ba Autór Judisiáriu
Planu rekrutamentu vaga ne’e prevee ona iha proposta Orsamentu Jerál Estadu (OJE) 2020, tanba ne’e, bainhira OJE 2020 aprova iha PN ho Prezidente Repúblika promulga sei loke rekrutamentu ba Timoroan sira atu prienxe vaga sira-ne’e.
Diretór CFJJ Antonino Gonçalves, ohin, ba Agência Tatoli, via telefónika informa, hosi númeru vaga ne’e kandidatu ema na’in-15 ba juis, nain-15 ba prokuradór no nain-15 defensór públiku.
Loloos antes ne’e SFJJ loke ona vaga refere, tanba kestaun OJE 2020 foin lalais sumba iha Parlamentu Nasionál (PN) nune’e labele realiza hodi suspende to’o mai ohin loron.
Antonino Gonçalves esplika, rekizitu atu konkorre vaga refere mak presiza duni timoroan, tenke lisensiatura iha area direitu, laiha rejistu kriminál, saúde di’ak ho seluk tan.
“Hanesan ita hotu rona tuir informasaun katak iha fulan setembru agora Governu sei ba aprezenta orsamentu iha PN, nune’e kuandu aprova ona ita bele loke inskrisaun no iha janeiru 2021 bele hahú kursu,” tenik Antonino Gonçalves.
Jornalista : Nelson de Sousa
Editór : Francisco Simões
