Reprezentante petisionáriu na’in-31 hasoru Sekretáriu Estadu Komunikasaun Sosiál, Merício Juvinal dos Reis ‘Akara’, iha Palásio Governu, segunda (13/07). Imajen Tatoli/Jogerjo Guterres

DILI, 13 jullu 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’ konsidera petisaun ne’ebé submete husi jornalista na’in-31 ne’ebé lidera husi jornalista Noemio Falcão iha baze legál ne’ebé tuir duni Konstituisaun Repúblika Demokrátika Timor-Leste (RDTL).

Jornalista hirak ne’e hatama petisaun iha loron 09 jullu, ne’ebé dirije ba Prezidente Parlamentu Nasionál, Aniceto Longuinhos Guterres Lopes tanba kestiona legalidade eleisaun ne’ebé Conselho de Imprensa (CI) organiza iha loron 4 jullu 2020, iha Delta Nova hodi hili reprezentante iha CI.

“Ha’u simu petisaun iha semana kotuk no lee ona inklui ha’u-nia ekipa jurídiku mós haree, entaun ami deside enkontru direta ho sidadaun sira ne’ebé mak halo petisaun. Iha enkontru ne’e ami troka ideia, ha’u rona didi’ak sira-nia esplikasaun no ha’u-nia pozisaun dahuluk maka prosesu ne’ebé sira halo ne’e dentru Konstituisaun, tanba Konstituisaun rasik asegura sidadaun hotu bele halo petisaun bainhira haree violasaun ba lei ruma,” hateten Sekretáriu Estadu Akara hafoin ramata enkontru ho reprezentante petisionáriu sira iha salaun enkontru Sekretaria Estadu Komunikasaun Sosiál (SEKOMS), iha Palásiu Governu, segunda ne’e.

SECOMS,Mericio Akara.Imajen/Jogerjo Guterres

Notísia Relevante: Jornalista Na’in-31 Hatama Petisaun Ba PPN Tanba Kestiona Legalidade Prosesu Eleisaun

Iha biban sorumutuk entre Inisiadór Petisaun, Noemio Falcão no Reprezentante Petisionáriu na’in-31, Rita Almeida no Sekretáriu Estadu Akara, governante ne’e apresia ho inisiativa jornalista ne’ebé hanesan sidadaun tanba hambrik hodi defende Lei Komunikasaun Sosiál.

“Apresia sidadaun sira ne’ebé maka iha inisiativa hanesan ne’e, ha’u-nia pozisaun daruak maka hanesan Sekretáriu Estadu Komunikasaun Sosiál, iha devér ida maka tenke asegura atu Lei Komunikasaun Sosiál ne’e funsiona tuir nia dalan,” nia akresenta

Biban ne’e, Akara husu ba órgaun komunikasaun sosiál hotu tenke konsidera Lei Komunikasaun Sosiál hanesan mata-dalan hodi halo idaidak ninia knaar.

“Husu liuliu ba Konsellu Imprensa no Asosiasaun Jornalista sira tenke iha liña oin hodi implementa Lei Komunikasaun Sosiál, labele órgaun sira ne’e mak fila kotuk fali ba lei ne’e. Bainhira ita la kumpre Lei Komunikasaun Sosiál, maka ita laiha autoridade morál atu krítika ema, eziji ema halo tuir Lei Komunikasaun Sosiál. Ne’e duni ita sira ne’ebé maka servisu iha área komunikasaun sosiál tenke uza duni mata-dalan ne’e ba kualkér atuasaun atividade ne’ebé mak ita halo tanba iha lei ne’e ko’alia momoos katak jornalista ne’ebé tuir votasaun tenke iha karteira profisionál, kuandu sai ona funsionáriu públiku labele tanba la halo knaar jornalizmu nia, sa tán ba tuir votasaun,” nia subliña.

Sekretáriu Estadu ne’e informa, tempu badak sei organiza fali ekipa SEKOMS no sei koordena ho Asosiasaun Jornalista sira atu hahú fali disemina Lei Komunikasaun Sosiál ba sidadaun sira tanba uluk realiza no prodúz ona livriñu hodi distribui maibé ho situasaun daudaun nia konsidera nesesáriu atu disemina lei ne’e, hodi nune’e ema hotu bele intende loloos.

Nia kompromete sei akompaña prosesu ne’e, nune’e iha ikus lei mak determina prosesu hotu iha área komunikasaun sosiál.

Iha sorin seluk, Portavóz no Reprezentante Petisionáriu sira, Noemio Falcão, agradese ba Sekretáriu Estadu Akara tanba hafoin simu petisaun, bele konvoka reuniaun ida hodi rona direta razaun husii petisionáriu sira submete petisaun.

Representante jornalista asinantes sira hasoru SECOMS, iha Palacio Governu.Imajen Jogerjo Guterres

“Ha’u nu’udar portavóz konsidera reuniaun ne’e hanesan inisiativa ne’ebé mak di’ak, Sekretáriu Estadu apresia ba inisiativa ne’ebé mak ami hala’o tanba konsidera hanesan jornalista ida ne’ebé defende Lei Komunikasaun Sosiál. Ami agradese mós tanba Sekretáriu Estadu bele akompaña prosesu ne’e ba oin,” dehan Noemio.

Nia haktuir, prosesu ne’e daudaun kontinua la’o ba oin no hein hela desizaun husi Tribunál Rekursu, tanba pertisaun ne’e entrega mós ba Tribunál Rekursu, Parlamentu Nasionál, Ministériu Asuntu Parlamentár no Komunikasaun Sosiál (MAPKOMS), inklui SEKOMS.

Razaun petisionáriu na’in-31 hatama petisaun tanba konsidera eleisaun ba reprezentante CI la tuir lei númeru 5/2014 Komunikasaun Sosiál nian no dekretu-lei númeru 25/2015 Estatutu Konsellu Imprensa nian, tanba tuir baze legál rua ne’e, eleisaun permite de’it reprezentante jornalista iha CI hili hosi jornalista sira maibé realidade ne’ebé hatudu iha konferénsia ne’e maioria husi partisipante ema na’in-256 la’ós jornalista.

Iha Estatutu CI, artigu 17 kona-ba Eleisaun Reprezentante Jornalista no Órgaun Komunikasaun sosiál sira-nian, haktuir iha alínea 4 katak ema ne’ebé bele kandidata-an no ema hili nu’udar reprezentante jornalista sira-nian.

Nune’e mós, jornalista sira ne’ebé iha kapasidade ho karteira profisionál ne’ebé fó-sai husi CI ne’ebé la hala’o knaar sira maka la hanesan ho profisaun jornalista nian tuir artigu 17 Lei Komunikasaun Sosiál nian no ema propoin hosi proponente mínimu porsentu lima husi jornalista sira-ne’ebé iha kapasidade ho karteira profisionál ne’ebé fó-sai hosi CI.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here