SEFOPE Sei Anúnsia Rezultadu Rekrutamentu Traballadór ba Programa SWP 2019

DILI, 14 jullu 2020 (TATOLI) – Sekretaria Estadu Formasaun Profisionál no Empregu (SEFOPE) sei anúnsia rezultadu rekrutamentu ba kandidatu traballadór Seasonal Worker Programme (SWP) ba Austrália, husi munisípiu tolu ne’ebé halo iha tinan kotuk.

Diretór Nasionál Empregu Esteriór SEFOPE, Filomeno Soares, dehan rekrutamentu ne’ebé hala’o hahú kedan iha 2019 iha Dili, Liquiçá no Oé-cusse maibé rezultadu seidauk fó sai no kandidatu barak maka maihusi Dili.

“Ita seiduk fó sai rezultadu tanba sei iha faze halo verifikasaun ba sira-nia dokumentu, hafoin totál hira maka ita sei públika iha tempu badak ba kandidatu sira ne’ebé maka aplika atu ba serbisu iha Austrália, ne’ebé aplika iha 2019,” tenik Diretór ne’e ba Agência Tatoli iha SENAI Becora, segunda ne’e.

Iha tinan 2019, númeru kandidatu ba WFP Austrália iha Munisípiu Dili maka 13.000, enkuantu iha Munisípiu Liquiçá nia hamutuk 1.410, maibé sira ne’ebé liu vaga hamutuk 959, no la liu hamutuk 400 resin.

Enkuantu, prosesu rekrutamentu SWP ba tinan kotuk iha Oé-cusse nian, aplikante hamutuk 900 resin maibé  sira ne’ebé liu hamutuk 600.

Rekrutamentu SWP 2019 ne’ebé pendente no traballadór Austrália ne’ebé liu vaga seidauk konsege ba serbisu tanba situasaun surtu COVID-19, halo Austrália, Korea inklui Timor-Leste sei taka aeroportu.

“Agora ita-nia Estadu Emerjénsia ramata ona no atividade sei hala’o nafatin. Bainhira Austrália no Korea loke ona aeroportu ita bele la’o ona maibé daudaun ita prepara hela sira,” nia akresenta.

Jornalista: Natalino Costa 

Editora: Julia Chatarina