Prezidente Timor Gap sesante, Francisco da Costa Monteiro halo hand over ba atuál Prezidente Timor Gap, António José Loiola de Sousa, segunda (13/07). Imajen/Natalino Costa

DILI, 13 jullu 2020 (TATOLI)Prezidente Konsellu Administrasaun Timor Gás & Petróleu, Empreza Públika (Timor Gap, Ep), António José Loiola de Sousa, promete iha ninia mandatu sei kontinua defende rikusoin hanesan mina no gás hodi garantia prosperidade povu no nasaun Timor-Leste.

António de Sousa ne’ebé antes ne’e nu’udar Vise-Prezidente Timor Gap, hetan nomeasaun liuhosi desizaun Konsellu Ministru iha loron 08 jullu hodi troka Prezidente sesante, Francisco da Costa Monteiro ba mandatu tinan-haat, hahú 2020 to’o 2024.

“Ami-nia knaar prinsipál maka tenke luta maka’as ba prosperidade dezenvolvimentu ba país ida-ne’e. Hakarak ka lakohi atu mudansa fali oinsá kuandu ami tama ona iha office Timor Gap nia-laran, ami-nia objetivu maka tenke esforsu ami-nia an iha setór petróliu no gás,” dehan Jerente foun ne’e hafoin ramata seremónia hand over husi Prezidente Timor Gap sesante ba atuál Prezidente Timor Gap, ne’ebé hala’o iha Timor Plaza, segunda ne’e.

Notísia Relevante: Ezonerasaun Prezidente KA Timor Gap, PM Taur: “Konsellu Ministru Delibera Proposta MPM”

Tuir nia, papél importante Timor Gap maka tenke garante sustentabilidade setór petrolíferu ne’ebé hanesan vizaun boot.

“Timor Gap sein dúvida, ba ha’u-nia knaar tenke defende no luta ba rikusoin tanba esforsu ne’ebé maka di’ak ba povu no nasaun ne’e maka Timor Gap hamrik iha oin hodi defende,” nia subliña.

Iha fatin hanesan, Prezidente Timor Gap sesante, Francisco da Costa Monteiro konsidera empreza estatál petrolíferu ne’e nu’udár papél espesífiku hodi haree ba kestaun negósiu, ne’ebé bazeia ba estudu nesesáriu balun bele asegura rekursu naturál Timor-Leste.

“Kaer estudu sira ne’e hodi defende ita-nia rekursu. Tanba rikusoin sira ne’e iha tempu naruk nia-laran Timor Gap  konsege halo esfosu maka’as hodi suporta Governu iha dezafíu barak. Ba ida-ne’e ha’u orgullu hanesan Prezidente Timor Gap sesante bele passa ba Prezidente foun atu nune’e bele dudu no lori serbisu ne’e ba oin,” nia subliña.

Nia dehan, buat seluk ne’ebé Timor Gap halo daudaun ne’e maka dezenvolvimentu iha Tasi Mane no esplorasaun rai-maran ne’ebé maka la’o hela, maski tanba tinan ne’e tama situasaun COVID-19 maka la konsege halo entaun sei hein fali tinan oin.

“Iha tempu badak sasán sira ne’ebé maka Timor Gap konsege atinje ona iha tinan hirak liubá agora Prezidente foun no ekipa bele kontinua ida ne’e,” akresenta Francisco Monteiro.

Nia la haree implikasaun emediata ba mudasa kargu Prezidente Timor Gap.

“Ha’u la haree implikasaun ruma ba iha mudansa ne’ebé akontese, maibé nu’udar Prezidente sesante saida maka ami kontribui hamutuk maka atu halo ona hand over ba Prezidente foun ho ekipa hodi bele ba oin di’ak liután,” nia tenika.

Iha seremónia ne’e partisipa husi reprezentante Ministériu Petroliu no Minerál inklui funsionáriu Timor Gap.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here