Prezidente Parlamentu Nasionál, Aniceto Longuinhos Guterres Lopez.

DILI, 13 jullu 2020 (TATOLI)—Prezidente Parlamentu Nasionál (PN), Deputadu Aniceto Longuinhos Guterres Lopes, sei keixa Bankada CNRT Ba Ministériu Públiku kona-ba lianguajen “hadau podér” no “asalta”.

“Maluk CNRT sira atu sai hotu karik, ha’u tatoli hela lia ba maluk deputadu CNRT nian. Ha’u-nia toleránsia másimu tiha ona ba linguajen sira-ne’e. Se kontinua hanesan ne’e, ha’u mós iha direitu atu buka justisa no ha’u sei halo nu’udar Prezidente Parlamentu Nasionál halo partisipasaun ida ba Ministériu Públiku kona-ba lianguajen “hadau podér” no “asalta” para lalais prosesa kedas ba kazu dia 18 no dia 19 maiu ninian. Ha’u hein justisa,” Prezidente Parlamentu Nasionál, Deputadu Aniceto Longuinhos Guterres Lopes anunsia liuhosi plenária, Parlamentu Nasionál, segunda ne’e.

Deputadu Aniceto Guterres informa liuhosi plenária bainhira Deputadu Bankada CNRT, José Virgílio, konsidera meza prezidénsia ne’e hadau podér no asalta de’it.

Entretantu, iha plenária  ne’e, Deputadu Deputadu Bankada CNRT, José Virgílio, hateten Prezidente Parlamentu Nasional dadaun ne’e hadau de’it poder hosi Prezidente Arão Noé.

“Kona-ba meza kraik sai ba leten (meza prezidénsia) ne’e loos tanba ita boot sira halo asaltu duni, Arão Noé ne’e lejítima, ne’ebé hili hosi povu”, hateten Deputadu Bankada CNRT, José Virgílio.

Ho deklarasaun Deputadu CNRT ne’e halo deputadu sira hosi Bankada FRETILIN halo reasaun hamosu funu ho liafuan hosi ibun ba ibun no sujere ba Deputadu José Virgílio tenke haree ba lei sira.

Deputadu Bankada CNRT, José Virgílio ninia deklarasaun ne’e halo Prezidente Prezidente Parlamentu Nasionál, Aniceto Guterres laiha ona toleránsia ba linguajen ne’e.

“Ha’u toleránsia másimu tiha ona no laiha ona pasiénsia, para se mak sala loos, ha’u halo asaltu podér mós laiha buat ida maibé justisa ba aktu sira-ne’e mós tenke iha. Ha’u sei halo partisipasaun nu’udar Prezidente Parlamentu Nasionál direitamente ba Prokuradór Jerál Repúblika tanba ita labele kontinua hanesan ne’e. Prezidente ilegál, asaltu. Sé ita halo polítika hanesan ne’e, mai ita halo polítika hanesan ne’e,” Aniceto Guterres hateten.

Hatán ba kestaun ne’e, Deputada Bankada CNRT, Carmelita Caetano Monis, argumenta Konstituisaun RDTL artigu 94 hateten deputadu sira hosi Parlamentu Nasionál laiha responsabilidade sivíl, nein kriminál ba votu ka opiniaun saida de’it halo iha plenária PN.

“Kualkér opiniaun hosi deputadu sira iha Parlamentu Nasionál laiha responsabilidade sivíl no nein kriminál katak deputadu sira iha imunidade. Prezidente Parlamentu Nasionál mós jurista ida katak loke de’it artigu 94 iha konstituisaun hodi lee didi’ak,” hateten Deputada Bankada CNRT ne’e.

Bainhira PPN, Aniceto Guterres keixa duni, Deputada Carmelita Moniz, fundamenta órgaun hanesan Ministériu independente no imparsiál.

“Ami hatene katak órgaun sira-ne’e independente, imparsiál no neutru tanba sira kaer ba Konstituisaun Repúblika. Nia hato’o ba mós Ministériu Públiku sei la simu no arkiva tanba laiha dalan,” dehan nia.

Tuir Konstituisaun RDTL artigu 94 (Imunidade), alínea 1 hateten, deputadu sira la hatán ba lia sivíl, lia kriminál eh lia dixiplinár tan sira-nia votu no sira-nia hanoin bainhira hala’o daudaun kna’ar.

Alínea 2 hosi artigu ne’e fundamenta, imunidade parlamentár nian bele hasai tiha tuir buat ne’ebé hakerek iha Parlamentu Nasionál nia Rejimentu.

Tuir observasaun Agência TATOLI iha plenária Parlamentu Nasionál, situasaun ne’e mosu tanba deliberasaun kona-ba Kompizaun Meza Komisaun Permanente.

Deputadu sira hosi Bankada CNRT propoin Eis Prezidente Parlamentu Nasionál, Deputadu Arão Noé de Jesus da Costa Amaral, envolve iha Komisaun Permanente ne’e bainhira PN tama iha períodu resesu.

Nune’e mós to’o oras ne’e Deputadu Arão Noé de Jesus da Costa Amaral seidauk iha Komisaun Espesializada.

Bankada CNRT propoin Deputadu Arão Noé de Jesus da Costa Amaral atu tama iha Komisaun E (Ekonomia no Dezenvolvimentu) maibé Vise-Prezidente Komisaun E no Xefe Bankada KHUNTO, Olinda Guterres lakohi.

Jornalista : Evaristo Soares Martins  

Editór      :  Cancio Ximenes

  

HAKEREK NO HATÁN

Please enter your comment!
Please enter your name here