DILI, 13 jullu 2020 (TATOLI)–Diretór Jerál Ministériu Solidaridade Sosiál (MSSI), Rui Manuel Gago Exposto, hateten ekipa pagamentu iha Rejiaun Administrativa Espesiál Oé-Cusse Ambeno (RAEOA) ne’ebé atribui subsisídiu ba benefisiáriu sira atinji ona 70.3%.
“Iha loron da-sia nian, ekipa pagamentu hosi RAEOA selu ona ita-nia benefisiáriu hamutuk 14.094, ho totál osan ne’ebé selu ona hamutuk $2.818.800. Ekipa pagamentu iha RAEOA ne’ebé atribui subsisídiu ba benefisiáriu sira atinji ona 70.3% hosi naran lista benefisiáriu hamutuk 20.032 no totál orsamentu aprovadu ba RAEOA $4.006.400,” dehan Diretór Jeral MSSI, Rui Manuel Gago Exposto, ba jornalista sira liuhosi konferénsia imprensa iha salaun MSSI, Caicoli, Dili, segunda ne’e.
Nia relata, iha Sub Rejiaun Nitibe, totál uma-kain ne’ebé simu ona pagamentu hamutuk 2.370, totál osan ne’ebé selu ona $ 474.000 no totál naran iha lista benefisiáriu hamutuk uma-kain 3.503.
Iha Sub Rejiaun Oesilo, totál uma-kain ne’ebé simu ona pagamentu hamutuk 1.941, totál osan ne’ebé selu ona $ 388.200 no totál naran iha lista benefisiáriu hamutuk uma-kain 3.333.
Iha Sub Rejiaun Pante Macassar, totál uma-kain ne’ebé simu ona pagamentu hamutuk 9.443, totál osan ne’ebé selu ona $1.888.600 no totál naran iha lista benefisiáriu hamutuk uma-kain 11.137.
Iha Sub Rejiaun Passabe, totál uma-kain ne’ebé simu ona pagamentu hamutuk 340, totál osan ne’ebé selu ona $68.000 no totál naran iha lista benefisiáriu hamutuk uma-kain 2.059.
Entre benefisiáriu sira ne’e iha benefisiáriu bazeia ba jéneru ne’ebé simu ona pagamentu to’o ohin loron, feto 17,8% no mane simu ona 82,2 % no totál reklamasaun ne’ebé tama to’o ohin loron hamutuk uma-kain 450.
Jornalista : Osória Marques
Editór : Cancio Ximenes
