Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão

DILI, 13 jullu 2020 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, propoin diálogu entre jornalista sira kona-ba reprezentasaun hosi Asosiasaun Jornalista Timor-Leste (AJTL) ba Coselho de Imprensa relasiona ho petisaun ne’ebé jornalista 31 entrega ba Prezidente Parlamentu Nasional ne’e. 

Notísia Relevante: AJTL Husu PN Atu Anula Petisaun Jornalista 31

“Petisaun ne’e ha’u mós simu kopia. Ha’u lee hotu ona kopia ne’e, maibé ha’u hanesan koñesimentu de’it. se parte jornalista sira sente katak ne’e ladún loos, kaer ho imi-nia estatutu, kaer ba lei ruma ne’ebé regulariza imi iha prosesu sira-ne’e. Ha’u hanoin, ita rekorre ba tribunál atu bele fó solusaun di’ak liu. Ha’u hanesan ministru, diálogu di’ak liu halo diálogu. Kuandu diálogu mós labele hotu ona entaun ba tribunál,” dehan Francisco Jerónimo ba jornalista sira, iha Parlamentu Nasionál, segunda ne’e.

Nia dehan, bainhira entre jornalista sira laiha solusaun liuhosi dalan diálogu entaun dalan ikus tribunál mak bele fó solusaun di’akliu, ikus mai ema hotu kumpre desizaun saida de’it.

“Ha’u hanesan ministru, sé bele haree fila-fali regra sira-ne’e, la kumpre duni Lei Komunikasaun Sosiál ka lae, entaun tenke hadi’a fali,” nia fó hanoin.

Lei Komunikasaun Sosiál, nia esplika, regulariza atividade komunikasaun sosiál hotu-hotu no mós entidade hotu-hotu maibé Asosiasaun Jornalista Timor-Leste (AJTL) mós iha nia estatutu rasik.

“Ha’u rasik laiha estatutu AJTL nian. Husu para hotu-hotu haree fila-fali estautu AJTL nian no mós haree fila-fali prosesu (eleisaun reprezenasaun ba Konsellu Imprensa) ne’e hotu, falla iha ne’ebé. Se dehan prosesu ne’e sala, tanba saida mak sala no sala iha ne’ebé, hodi konfirma mós Lei Komunikasaun Sosiál,” nia dehan.

Nia hakuir, estatutu AJTL nian ne’e ba de’it jornalista ka nakloke ba ema hotu-hotu tanba molok Lei Komunikasaun Sosiál sai, estatutu AJTL iha tiha ona.

“Lei Komunikasaun Sosiál foin halo ikus. AJTL hamriik kedas dezde 2000. Se lei komunikasaun sosiál hatete hanesan ne’e, bainhira lei komunikasaun sosiál sai, estatutu AJTL nian revoga entaun ne’e buat ketak ida. Estatutu mós baze legál ida. Ita la ko’alia estatutu boot liu lei komunikasaun sosiál tanba lei ne’e iha laran la ko’alia dehan revoga hotu estautu AJTL bainhira lei komunikasaun sosiál sai,” Ministru Asuntu Parlamentár no Komunikasaun Sosiál, Francisco Jerónimo, hateten.

Jornalista : Evaristo Soares Martins

Editór      :  Cancio Ximenes

 

 

HAKEREK NO HATÁN

Please enter your comment!
Please enter your name here