Ministry Agrikultura no Peska, Pedro Reis. Imajen/Egas Cristovão

DILI, 13 jullu 2020 (TATOLI) – Ministériu Agrikultura no Peska (MAP) planea ona atu define folin kafé kada kilograma, nune’e bele hasa’e liután rendimentu ekonomia família agrikultór kafé sira nian.

Ministru Agrikultura no Peska, Pedro dos Reis, hateten hasa’e folin kafé kada kilograma no apoia fasilidade ba produsaun kafé sai mós ninia planu durante mandatu.

Relasiona ho folin kafé kada kilograma ne’ebé tún Ministru konsidera hanesan problema boot ida tanba durante ne’e seidauk iha duni regulamentu ka tabela ida hodi define loloos folin kafé iha rai-laran, alende ne’e Timor-Leste sei adopta sistema merkadu livre.

“Ne’e mak problema boot ba ita, klaru katak ami hanesan ema foun iha ministériu ne’e, tanba ne’e maka ho prezensa ami-nian ha’u sei hamutuk ho tékniku sira atu kria regulamentu ida hodi define loloos folin tanba ita mós adopta merkadu livre, entaun pelu menus bele iha liña koordenasaun ne’ebé di’ak hodi haree loloos problema ne’e hodi nune’e bele rezolve,” hateten Ministru Pedro ba Agência Tatoli iha salaun Ministériu Finansa, Aitarak-Laran, segunda ne’e.

Notísia Relevante: La Afeta ba Produsaun Kafé iha krize COVID-19, Agrikultór Ermera Husu Governu Deside Folin

Ámbitu Prevensaun COVID-19, CCT Kontinua Sosa Kafé Tuir Ezijénsia Komunidade Agrikultór

Kona-ba empreza sira no Kooperativa Kafé Timor (CCT, sigla portugés), deside presu kafé kada kilograma tuir merkadu globál, governante ne’e promete sei konvoka reuniaun ho fonte sira ne’ebé durante ne’e sosa kafé agrikultór sira nian hodi tau ideia hamutuk.

“Tempu badak mós ha’u sei konvoka reuniaun ida hodi bolu hamutuk empreza sira ne’ebé durante ne’e sosa kafé agrikultór sira, bele hatún folin maibé labele hatún liu tanba ha’u hatene katak atu hetan kafé ne’ebé ho fuan di’ak presiza tempu no kuidadu didi’ak”, nia subliña.

Dadaun ne’e, CCT sosa kafé husi agrikultór sira ho folin kada kilograma sentavu 32.

Antes ne’e, agrikultór kafe iha Munisípiu Ermera preokupa ho folin kafé no husu Governu deside folin kada kilograma sentavu 50 ba kafé ne’ebé sei ho kulit.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here