Ambiente rejistrasaun kandidatu traballadór ne’ebé atu tuir teste molok dezloka ba Korea, iha SENAI Becora, segunda (13/07). Imajen/Natalino Costa

DILI, 13 jullu 2020 (TATOLI) – Sekretaria Estadu Formasaun Profisionál no Empregu (SEFOPE) liuhosi Diretór Nasionál Empregu Esteriór, Filomeno Soares, hateten parte SEFOPE hahú halo rejistrasaun ba kandidatu traballadór na’in-3.000 hodi ba tuir teste molok ba serbisu.

“Ita-nia joven ne’ebé maka ohin mai, maioria kandidatu traballadór Korea tanba sira konklui ona sira-nia kursu lian Korea nian. Tanba ne’e, sira mai atu rejistu sira-nia naran hodi ba tuir teste Employment Permit System molok dezloka ba servisu iha Korea Súl,” tenik Diretór Filomeno Soares iha SENAI Becora, segunda ne’e.

Tuir nia, Employment Permit System nu’udar kritériu ne’ebé Governu Korea Súl  estabelese iha Timor-Leste ba rekrutamentu traballadór Timor-Leste hodi serbisu.

“Sira rejistu tiha, hafoin tuir teste ba sistema ne’e no iha teste ne’e maka kandidatu sira liu maka ita konsidera katak  tama iha sistema  Work Ready Full atubele resposta ba demanda ne’ebé maka tama husi Korea mai ita,” nia akresenta.

Dirijente ne’e esplika, parte SEFOPE sei la fó teste ba kandidatu traballadór sira maibé teste ne’e fó direitamente husi ekipa husi Korea.

Rejistrasaun ba teste ne’e rasik ohin halo no ninia rezultadu sei hatene kedan, tanba ne’e kandidatu  sira ne’ebé ohin mai rejistu ne’e la signifika sira tama ona iha  sistema Work Ready Full hodi ba servisu direta iha Korea Súl.

“Sira rejistu hanesan kandidatu, bainhira rejistu hotu ona sira tuir teste  ba Employment Permit System no kuandu sira liu ona liu ona iha teste Korea sira haruka sira-nia naran ne’e mai SEFOPE hodi hatama iha lista hodi  konsidera  hanesan sistema Work Ready Full nu’udar traballadór ne’ebé maka prontu  tama atu ba serbisu, bazeia ba  demanda,” nia haktuir.

Nia dehan, SEFOPE iha obrigasaun atu proteje kandidatu traballadór sira hodi prepara-an ba serbisu bainhira naran tama ona sistema.

Rejistrasaun ba kandidatu traballadór Korea Súl hodi tuir teste hahú segunda ne’e to’o 17 jullu 2020, no rejistrasaun ne’e hala’o kada tinan ba kandidatu traballadór ne’ebé preparadu ba serbisu.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here