Asessór Prinsipál Gabinete Prezidente Parlamentu Nasionál, José António das Neves ‘Samalarua’, Imajen/Mídia CAC.

AILEU, 13 jullu 2020 (TATOLI)–Asesór Prinsipál Gabinete Prezidente Parlamentu Nasionál, José António das Neves ‘Samalarua’, konsidera fatin istóriku Aisirimou, Munisípiu Aileu, konsege prodús tan produtu boot ida ba estadu Timor-Leste (TL) iha tempu ukun rasik aan ne’e.

Notísia Relevante: CAC Konsidera Komisaun A Halo Esforsu Estraordináriu

Konsiderasaun ne’e, Samalarua hato’o relasiona ho diskusaun lei númeru 1/V/I-Medidas Prevensaun no Kombate Korrupsaun ne’ebé konsege diskute durante semana rua no konklui hodi aprova iha espsialidade iha fatin refere.

“Iha tinan 44 liu ba, iha fatin ida-ne’e, naran Aisirimou, iha eventu istóriku ba país ninian,  transformasuan polítika no iha fatin ida-ne’e mós  ita prodús produtu boot ida ba estadu, mak Medidas Prevensaun no Kombate Korrupsaun,” dehan Samalarua iha ninia intervensaun bainhira hato’o liafuan agradesimentu iha sesaun ikus diskusaun lei ne’e iha Mukit Guest House, Aisirimou, foin lalais ne’e.

Samalarua hateten, liga ho eventu ida-ne’e, Timor-Leste hahú artikula ho forsa estadu nian tomak ba hahalok ida-ne’ebé mak bele destroi integridade no kontinuidade ezisténsia estadu ne’e rasik.

“Tanba ne’e mak, ha’u hakarak hateten katak saida mak ita-nia opiniaun ne’e, la’ós apenas opiniaun de’it maibé ita tradús ba kompromisu. Ita tradús ba kompromisu, ho linguajen ne’ebé ita temi beibeik no repete beibeik durante diskusaun sira katak vontade polítika ne’e desizivu ba artikula esforsu tomak ba kombate korrupsaun iha Timor-Leste,” Samalarua hateten.

Asesór prinsipál gabinete Prezidente PN ne’e haktuir, istória ba Timor-Leste ninia esforsu atu kombate korrupsaun ne’e mós hahú hosi bainhira hatama proposta Lei Antí Corrupção (LAC) nian iha tinan 2010.

“Ita hare prosesu ne’e didi’ak ba to’o prosesu ne’e hakiduk ba to’o iha tinan 2004, kuandu estabelese Provedoria Direitus Humanus no Justisa. Kuandu hari Inspesaun Jerál Estadu, ninia sentidu saida, sentidu atu promove duni boa governasaun,” nia dehan.

Samalarua mós konsidera promove boa governasaun ninia kestaun boot mak kombate korrupsaun, tanba ne’e mak nia la’ós hahú iha tinan 2010.

Maibé, nia hatutan, hahú kedan hosi Timor-Leste hahú forma estadu ida-ne’e, hahú tau ona preokupasaun katak kombate korrupsaun, promove boa governasaun, justisa, direitu umanu, ne’e fundamentu ba esatdu ninia eszisténsia.

“Tanba ne’e mak esforsu la’ós foin mak la’o, ita la’o tiha ona lubuk ida. To’o momentu ida ita deside hodi foti medida ida-ne’ebé tenke forte, ne’ebé ita enkuadra iha lei ka produtu ida-ne’e. Produtu ne’e seidauk finál, sei iha faze lubuk ida tuir mai maibé la’ós faze ida-ne’ebé mak todan ona, Tanba produsaun finál, ha’u hanoin ita halo atu konjuga ita-nia esforsu sira hotu atu ita bele haree medida ne’ebé ita halo mak preventiva no medida represiva,” nia dehan.

Samalarua afirma, oras ne’e daudaun iha todan ba instituisaun lubuk ida mak CAC, autoridade judisiáriu, Ministériu Justisa, no ministériu  sira hotu, reforsa iha aspetu tékniku no aspetu rekursu, hotu-hotu tenke kontribui.

“Se lae, ita para de’it ho produsaun dokumnetu. Maibé, ninia implementasaun real ne’e ita sei dada tempu naruk. Tanba ne’e mak ha’u-nia apresisaun ba produtu ida-ne’e, ohin, ita basa liman ba ita nia aan. Maibé, ba oin mak ita presiza sidadaun tomak basa liman ba ida-idak nia aan, ikus liu hato’o obrigadu ba Prezidente komisaun A ninia lideransa, ba asesór sira hotu, ba entidade hotu ne’ebé fó ona hanoin di’ak sira durante diskusaun ba projetu lei ne’e,” nia hateten.

Entretantu, Komisaun A Parlamentu Nasionál ba Asuntu Konstitusionál no Justisa hamutuk deputadu na’in 10 lidera hosi Deputadu Joaquim dos Santos ‘Boraluli’ hamutuk ho konvidadu sira hosi instituisaun relevente sira, konklui diskusaun projetu Lei ne’e, iha loron Kinta (9/7) iha fatin istóriku, fatin ba luta libertasaun nasionál iha Frente Armada, Aisirimou, Munisipiu Aileu.

Ho terminasaun diskusaun Lei ne’e, povu Timor-Leste loke istória foun, iha luta foun hodi kontinua luta Asua’in Libertadór sira-nian ne’ebé iha tinan 1975 lidera hosi eroi Boot Fundadór Nasaun, Prezidenti Repúblika no Primeiru Ministru Nocolau Lobato hahú hosi fatin Aisirimou ho hari Forsa Armada Libertasaun Nasionál Timor-Leste (FALINTIL).

Projetu Lei Númeru 1/V/I-Medidas Prevensaun no Kombate Korrupsaun, ne’ebé ho Titulu hamutuk tolu (III), Primiru (I) kona-ba medidas preventivas Kombate Korrupsaun, Segundu kona-ba Dispozisaun Kriminál, no Tersieru (III) kona-ba Dispozisaun Finál, ho artigu hamutuk 120.

Jornalista : Cipriano Colo

Editór      :  Cancio Ximenes

HAKEREK NO HATÁN

Please enter your comment!
Please enter your name here