Aviaun ZEESM. Imajen/twinotterarchive

DILI, 13 jullu 2020 (TATOLI) – Hafoin Governu Timor-Leste liuhosi Autoridade Aviasaun Sivíl Timor-Leste (AACTL, sigla portugés) iha loron 03 abríl suspende provizóriu voo internasionál inklui doméstiku, maka hahú 13 jullu ne’e re-ativa hikas voo doméstiku 

Ministériu Transporte no Komunikasaun (MTK) notifika ona operadór aviaun sira ne’ebé durante ne’e halo operasaun komersiál.

“Tanba Estadu Emerjénsia ramata ona, Autoridade Aviasaun Sivíl Timor-Leste hakarak informa katak operasaun doméstiku komersiál autoriza hodi halo operasaun ho normál husi operadór aviaun sira,” refere nota ofisiál ne’ebé Agência tatoli asesu, segunda ne’e.

Notísia Relevante: Hahú Ohin, AACTL Suspende Temporáriu Operasaun Komersiál Internasionál

Iha biban hanesan, nota ne’e la esplika bainhira mak sei re-ativa hikas operasaun komersiál internasionál ne’ebé antes ne’e hetan suspensaun.

Antes ne’e, iha loron 09 jullu AACTL fó sai maski Estadu Emerjénsia ramata ona, maibé operasaun komersiál no operasaun ba aviaun charter nafatin suspende temporáriamente to’o fó fali notifikasaun husi autoridade atu hala’o operasaun.

Operasaun komersiál internasionál ne’ebé hetan suspensaun provizóriu maka hanesan operasaun komersiál internasionál (designated and charter) ba aviaun ne’ebé halo operasaun mai Timor-Leste ho rute Denpasar-Dili-Denpasar, Kupang-Dili-Kupang, Darwin-Dili-Darwin no Singapura-Dili-Singapura.

Maibé, operasaun ba kondisaun emerjénsia no voo importante sira iha ámbitu surtu COVID-19 sei nafatin la’o.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here