Diretór Nasionál Empregu Esteriór Sekretaria Estadu Formasaun profesionál no Empregu, Filomeno Soares. Imajen/espesiál

DILI, 13 jullu 2020 (TATOLI) – Diretór Nasionál Empregu Esteriór husi Sekretaria Estadu Formasaun Profisionál Empregu (SEFOPE), Filomeno Soares, informa parte SEFOPE simu ona kontaktu katak traballadór timor-oan iha Austrália sei fila mai Timor-Leste iha fulan ne’e nia-laran.

“Sira atu fila mai iha fulan ne’e nian-laran maibé loron loloos maka seidauk hatene. Ami simu informasaun katak ema ni’in-23 atu fila mai Timór,” tenik Diretór ne’e iha SENAI Becora, segunda ne’e.

Nia dehan, traballadór sira ne’e deside fila tanba enfrenta hela problema ne’ebé la’ós de’it tanba kontratu ramata.

“Sira deside fila la’ós tanba buat balun de’it, maibé tanba balun moras, balun problema família no balun grávida ona, tanba ne’e maka sira deside  atu fila,” Filomeno Soares subliña.

Daudaun  ne’e, traballadór timor-oan hamutuk 1.100 maka servisu iha Austrália no husi númeru ne’e, raballadór hamutuk na’in-30 maka kontratu ramata ona maibé seidauk bele fila tanba aeroportu taka hotu.

Tuir dadus husi Sekretaria Estadu ba Formasaun Profisionál no Empregu (SEFOPE) husi tinan 2014 to’o 2018, timor-oan hamutuk 2.819 maka servisu ona iha Austrália liuhosi programa Seasonal Worker iha área ospitalidade no ortikultura no konsege rekolla retornu milliaun $9.698.579,15 mai Timor-Leste.

Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, 2017 na’in-782, 2018 ema na’in-1.380 no 2019 ema lima.

Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun servisu repetidu to’o dala haat hafoin kompleta servisu ho durasaun fulan-neen, bazea ba prestasaun servisu traballadór iha kompañia sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here