Abitante timoroan tama mai Timor-Leste liuhosi fronteira terrestre Motain, Bobonaro, kuarta (24/06/2020). Imajen/dok. privadu

DILI, 13 jullu 2020 (TATOLI)-Diretóra Jerál Prestasaun Saúde, Odete Viegas da Silva, relata ema na’in 155 maka tama territóriu Timor-Leste liuhosi pontu entrada fronteira terrestre, Motain Bobonaro, RAEOA no Covalima hahú loron 6 to’o 12 fulan-jullu 2020.

Husi númeru refere, ema na’in 48 tenki kumpre auto-kuarentena iha uma no ema na’in 107 iha kuarentena obrigatóriu  durante loron 14 hodi prevene transmisaun surtu COVID-19 iha rai-laran.

”Iha mós ema na’in hitu ne’ebé tama klandestina mai teritóriu husi númeru ne’e na’in rua sidadaun estranjeiru ne’ebé tama husi Santa Rosa Ponte kais tuan Oé-Cusse  tanba roo aat no parte Servisu Imigrasaun deporta fila ona,”dehan Odete, durante konferénsia imprensa iha Caicoli.

Sidadaun na’in tolu seluk hetan prende husi parte seguransa tanba ultra pasa fronteira ho dalan ilegál iha área Tunubibi na’in ida no Memo na’in rua iha Munisípiu Bobonaro. No sira na’in tolu daudaun ne’e kumpre hela kuarentena obrigatóriu.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here