Komandante Polísia Munisípiu Dili, Superintendente Xefe, Hendrique da Costa no Segundu Komandante Superintendente Asistente Xefe, Euclides Belo hala’o konferénsia imprensa, segunda (13/07/2020). Imajen/Eugénio Pereira

DILI, 13 jullu 2020 (TATOLI- Komandante Polísia Munisípiu Dili, Superintendente Xefe Hendrique da Costa, informa kronolojia asidente tráfegu ne’ebé akontese iha área estrada  Suku Hera, Postu Administrativu Cristo Rei, Dili, kauza hosi halai ka kondús ho velosidade.

Notísia Relevante : KMD Aprezenta Motór 451 Atu Leilaun

Tuir relatóriu investigasaun Polísia nota,  katak karreta Jeep mutin ho matrikula A 21.222 baku fila  bainhira hala’o viajen hosi parte lorosa’e  nian atu mai Dili.

Asidente ne’e rezulta joven mane nu’udar kondutór nia ain karuk kotu kedas, no joven na’in tolu sofre kanek kaman tanba karreta baku fila pankada maka’as kona fatuk no rai.

“Asidente iha Hera ninia ne’e kauza tanba kondutór lori Jeep mutin ne’e halai ho velosidade no la kontrola aan hodi rezulta joven ida ain kotu no nain tolu sofre kanek kaman,” hateten Komandante Polísia Munisípiu Dili, Hendrique da Costa, ohin, ba jornalista liuhosi konferénsia imprensa iha Komandu Polísia Munisípiu Dili.

Hafoin akontesimentu parte polísia no komunidade evakua kedas vítima sira ba Ospitál Nasionál Guido Valadares (HNGV) no daudaun ne’e karreta ne’ebé baku fila PNTL seidauk ba foti.

Iha parte seluk, Komandu PNTL Seksaun Tránzitu Dili, durante semana primeira husi loron 01 too 12 jullu 2020, rejista kazu asidente hamutuk 17 kompostu hosi vítima kanek todan ema na’in-ida (1) no kanek kaman ema na’in-16.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here