Selebrasaun akordu entre Governu Timor-Leste no ADB ba subsisténsia kafé inklui agro-florestál, iha salaun Ministériu Finansa, segunda (13/07). Imajen. Mídia-MF

DILI, 13 jullu 2010 (TATOLI) – Banku Dezenvolvimentu Aziátiku (ADB, sigla inglés) apoia orsamentu millaun $3 ba Timor-Leste hodi mellora subsisténsia kafé inklui agro-florestál, ne’ebé orsamentu ne’e maihusi Governu Japaun maibé ADB mak jere.

“Apoia ne’e iha faze dahuluk atu halo intervensaun ba kafé. Molok realiza apoia ne’e, ADB mós antes ne’e fó asisténsia tékniku ba dezenvolvimentu planu iha setór kafé nian ba tinan 11 mai,” relata reprezentante ADB iha Timor-Leste, José Pereira, iha salaun Ministériu Finansa, Aitarak-Laran, segunda ne’e.

Reprezentante ADB iha Timor-Leste, José Pereira. Imajen/Mídia-MF

Verba ne’e ADB apoia liuhosi selebrasaun akordu ne’ebé Governu Timor-Leste reprezenta hosi Ministru Finansa, Fernando Hanjam enkuantu ADB reprezenta husi Diretór Banku Dezenvolvimentu ne’e iha Timor-Leste, Sunil Mintra maibé tanba la partisipa maka José Pereira maka reprezenta.

Seremónia ne’e asiste mós hosi Ministru Agrikultura no Peskas, Pedro dos Reis, Vise-Ministra Finansa, Sara Lobo Brites, inklui Embaixador Japaun iha Timor-Leste, Kinefuchi Masami.

Subvensaun ho montante millaun $3 atu apoia uma-kain agrikultór kafé sira hamutuk 2.000, ba prátika agrikultura ne’ebé di’ak no asesu ba finansa, no mós atu hasa’e liután kualidade kafé no ligasaun merkadu, inklui hadi’a moris iha área rurál sira hafoin krize COVID-19.

Iha sorin seluk, Ministru Finansa, Fernando Hanjam konsidera apoia ne’e estraordinária tebes.

“Kafé nu’udar produtu agríkola esportasaun signifikativu iha Timor-Leste, reprezenta besik porsentu 80 hosi esportasaun nain petrolíferu, produtu agíkola kafé hanesan parte ida husi kultura no fonte ida boot tebes iha nasaun  no komunidade tanba konsidera nu’udar identidade nasionál”, nia subliña.

Governante ne’e afirma, ADB iha ninia istória naruk relasiona ho setór kafé iha Timor-Leste hanesan dezempeña ne’ebé fundamentál hodi estabelese Asosiasaun Kafé Timor-Leste (ACTL, sigla portugés) no kontribui mós ba planu nasionál iha setór kafé inklui apoia finansiamentu ba investimentu kafé iha rai-liur.

Nune’e mós, Espesialista Seniór ADB ba Rekursu Naturál no Agrikultura ba Sudeste Aziátiku, Stefania Dina, konsidera dezenvolvimentu setór kafé iha Timor-Leste nu’udar prioridade nasionál ida tanba bele oferese dalan di’ak ida atu hamenus ki’ak no dezigualdade, hadi’a seguransa ai-han no haburas ekonomia naun-petrolífera.

“Projetu ne’e sei hasa’e liután kualidade kafé no asesu ba merkadu no sei apoia nasaun nia rekuperasaun ekonómika hafoin situasaun COVID-19 liuhosi tulun atu hadi’a moris iha área rurál sira no promove dezenvolvimentu setór privadu,” subliña espesialista ne’e.

Nia nota, kafé nu’udar Timor-Leste nia produtu esportasaun naun-petrolífera ne’ebé boot liu, tanba kuaze uma-kain porsentu 37,5 resin mak kuda kafé, enkuantu metade husi númeru ne’e mak depende liu ba rendimentu hosi kafé.

Maski nune’e, espesialista ne’e observa katak setór ne’e nia operasaun sei dook tebes husi ninia poténsia ba tempu naruk nian tanba produsaun ne’ebé ki’ik no la estável, kualidade produtu la konsistente, no jestaun ba setór kafé sei fraku, nune’e lori konsekuénsia ba uma-kain barak ne’ebé prodúz kafé sei moris nafatin iha ki’ak nia-laran.

Projetu hadi’a kafé no agro-floresta, ne’ebé finansia husi Fundu Japaun ba Redusaun Pobreza, foka liu ba munisípiu sira ne’ebé prodúz kafé mak hanesan Aileu, Ainaro, Bobonaro, Ermera, Liquiçá, no Manufahi.

“Ninia intensaun mak atu halo produsaun dobru ba nasaun nia kafé no agro-floresta no buka dalan atu alkansa aumentu rendimentu esportasaun kafé to’o porsentu 27 iha tinan 2030. Projetu ne’e mós sei tulun Governu atu hametin jestaun informasaun, koordenasaun, no fahe koñesimentu,” nia esplika.

Projetu ne’e sei fasilita implementasaun Planu Dezenvolvimentu Setór Kafé ba tinan 11 nian, ne’ebé hetan aprovasaun husi Governu iha 2019 ho apoiu husi ADB no institutu mundiál ida ne’ebé hanaran Coffee Quality Institute.

Iha planu ne’e nia-laran, Govenu sei investe millaun $38 ba área prinsipál neen hanesan peskiza no dezenvolvimentu, produsaun no produtividade, kualidade no valór adisaun nian, asesu ba merkadu, konsumu doméstiku no turizmu, no jestaun koordenasaun setór kafé nian.

Projetu ne’e bazeia ba ADB nia serbisu anteriór iha setór kafé, inklui subsídiu ho montante millaun $1 ne’ebé aprova iha 2018 hodi fó tulun ba agrikultór kafé ho eskalaun ki’ik sira iha Timor-Leste atu hadi’a sira-nia produtividade no kualidade hodi bele hatán ba padraun sertifikasaun internasionál nian.

Nune’e mós, ADB iha komprimisu atu alkansa moris ne’ebé prósperu, inkluzivu, reziliente, no sustentável iha Ázia no Pasífiku, no iha tempu hanesan sustenta mós ninia esforsu atu halakon ki’ak ne’ebé estremu.

ADB estabelese iha 1966, ho nasaun membru hamutuk 68 no nasaun 49 mak husi rejiaun ida ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here