Kakau iha plantasaun CCT Railaco. Imajen Tatoli/António Gonçalves

ERMERA, 12 jullu 2020 (TATOLI)Kooperativa Kafé Timor (CCT, sigla portugés), liuhosi Fábrika Prosesamentu Kafé Railaco, Munisípiu Ermera aleinde sosa kafé hosi agrikultór kafé sira, kooperativa ne’e kuda mós kakau iha rai ektare tolu iha plantasaun Railaco.

“CCT aleinde sosa produtu agrikultór sira nian, hakarak kuda rasik ho razaun ida katak hanorin agrikultór sira iha inisiativa liután buka rasik osan hodi susteta ekonomia família”, dehan Koordenador Fábrika Prosesamentu Kafé no Responsável CCT Railaco, José Almeida dos Santos ba Agência Tatoli iha nia knaar fatin, CCT Railaco, Munisípiu Ermera, sesta (10/07).

Koordenadór Fábrika Prosesamentu Kafé no Responsável CCT-Railaco, José Almeida dos Santos. Imajen Tatoli/António Gonçalves

Responsável ne’e haktuir, kakau sira ne’ebé kuda iha Railaco kuandu tasak, CCT nia tékniku sira kolleta hafoin halo firmentasaun ka fase durante loron neen no liu tiha loron ne’e fera kakau hodi ense ba ninia fatin ne’ebé mak prepara.

“Durante iha nia fatin ne’e loron haat, kuandu loos ona maka lori ba habai durante loron lima, no maran maka haruka ba armejen iha Comoro, Dili hodi hein halo esportasaun,” nia akresenta.

Totál rai ne’ebé mak CCT okupa iha Railaco hamutuk ektare 13 no utiliza hodi kuda kakau, pimenta, kafé híbrida, kuda mós aifuan hanesan hás, kelenkeng, kulu no seluk tán.

Rezultadu kakau ne’ebé CCT kuda iha plantasaun Railaco. Imajen Tatoli/Antónia Gusmão

Rai ektare haat tau bee foer enkuantu ektare tolu uza habai kafé no éktare ida uza hodi halo adubu órganiku.

Durante ne’e mós CCT sosa kakau hosi komunidade agrikultór sira no fahe ba parte rua, kuandu kakau kualidade di’ak kada kilograma ida $2 no bainhira ladún di’ak kilograma ida $1,50 sentavu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here