Xefe Sentru Saúde Gleno, Munisípiu Ermera, José de Carvalho. Imajen Tatoli/António Gonçalves

ERMERA, 11 jullu 2020 (TATOLI) Maski Timor-Leste la implementa ona Estadu Emerjénsia ligadu ho surtu COVID-19, tanba kazu konfirmadu iha Timor-Leste laiha ona, maibé Estadu nafatin apela ba komunidade atu implementa medida preventiva ne’ebé estabelese ona husi Organizasaun Mundiál Saúde (OMS) inklui Ministériu Saúde (MS).

Tanba ne’e, Sentru Saúde Postu Administrativu Gleno, Munisípiu Ermera nafatin halo prevensaun no kontinua halo triajen ba komunidade sira iha sentru saúde refere.

Xefe Sentru Saúde Gleno, Munisípiu Ermera, José de Carvalho, hateten sentru saúde ne’e haree liu ba iha situasaun agora, tanba iha previzaun katak COVID-19 seidauk hotu no haree nasaun viziñu hanesan Indonézia sei rejista moras ne’e, tanba ne’e nafatin iha vijilánsia saúde.

“Ami antisipa nafatin hodi halo prevensaun no médiku sira ne’ebé responsável ba COVID-19 kontinua halo triajen, atu nune’e moras sira ne’ebé tama mai bainhira diágnostiku iha ligasaun ho moras COVID-19 hanesan mear, isin-manas, iis boot entaun sira tenke liu iha fatin triajen no halo kedas tratamentu iha fatin ne’ebé prepara ona,” relata Responsável Sentru Saúde Gleno ba Agência Tatoli iha ninia knaar fatin, Sentru Saúde Gleno, sexta (10/07).

Aleinde ne’e, pesoál saúde sira mós kontinua halo promosaun ba medida prevensaun sira hanesan fase liman, distansiamentu sosiál, no uza máskara.

Nia dehan, Sentru Saúde Gleno iha ai-moruk sufisiente hodi fó ba populasaun sira ne’ebé ba halo tratamentu, liuliu ai-moruk ba mear no isin-manas.

Iha Sentru Saúde Gleno iha médiku timor-oan na’in-10, médiku kubanu na’in-tolu, enfermeiru na’in-12, parteira na’in-ualu, tékniku laboratóriu haat, dentista ida, no aliadu sira, nune’e totál profisionál saúde iha sentru saúde ne’e hamutuk 54.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here