Kondisaun Eskola Ensinu Báziku Filiál (EBF) Eraulo nú.230, ne’ebé laiha morru halo animál sira tama ho fásil ba arredór eskola. Imajen Tatoli/António Gobçalves

BAUCAU, 11 jullu 2020 (TATOLI)-Konsellu Inan-Aman husi Eskola Ensinu Báziku Filiál Buruma, Postu Administrativu Baucau Vila Munisípiu Baucau, konsege harii ona sala eskola ida ba estudante sira durante implementasaun Estadu Emerjénsia hodi fasilita prosesu aprendizajen.

Reprezentante Konsellu Inan-Aman EBF Buruma, Vicente Correia, hateten desizaun hodi harii sala eskola ne’e tanba hetan konkordansia mutua hosi Inan-Aman estudante sira-nian ho objetivu atu apoiu prosesu aprendizajen lorloron.

“Ami nia oan sira eskola iha ne’e ami mak sai matadalan ba sira atu trata mós sira-nia kondisaun, tanba ne’e ami oferese espasu sala ida ba eskola ne’e atu dirijente eskola sira bele jere ho didiak ba futuru oan sira nian,”dehan nia durante serimonia re-abertura prosesu aprendizajen ba estudante sira ne’ebé hala’o husi Vise Ministru Edukasaun Juventude no Desportu, António Guterres, kinta (09/07).

Kona-ba gastu orsamentu ba konstrusaun sala eskola ne’e, nia lakohi komenta ba públiku ho rajaun hakarak atu kontribui ba dezenvolvimentu área edukasaun iha fatin ne’ebá.

Iha biban hanesan Vise Ministru Edukasaun Juventude no Desportu, António Guterres, apresia ho inisiativa ne’e tanba konsidera fó ona kontribuisaun ba Governu hodi dezenvolve setór edukasaun.

“Ha’u hakarak dehan ho situasaun (Estadu Emerjénsia) ida ne’ebé ita nia governu labele halo buat hotu maibé,  iha Bruma mosu inisiativa di’ak husi inan-aman sira hodi oferta ba eskola ne’e sala ida ba estudante sira atu utiliza,”katak António Guterres.

Governante konsidera Konsellu Inan-Aman iha Brumo sai modelu no ezemplu di’ak  ba inan-aman estudante husi fatin seluk atu kontribui ba prosesu dezenvolvimentu.

“Ha’u mós husu ba autoridade eskola ida ne’e atu koidadu didiak infraestrutura sira ne’e, tanba na’in mak ita bo’ot sira, ha’u husu ba estudante sira atu koidadu fasilidade eskola sira ne’e tebe bola karik koidadu vidru sira atu labele rahun,”nia hateten.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here