DILI, 10 jullu 2020 (TATOLI)–Prezidente Rede Feto Timor Leste, Judite Dias Ximenes, hateten hahú iha fulan jullu ne’e Rede Feto dezloka ba Munisípiu 12 ho Rejiaun Administrativu Espesiál Oé-Cusse Ambeno (RAEOA), hodi halo análiza ba jéneru hodi haree impaktu empoderamentu ekonómiku ba feto benefisiária ba subsídiu EE ho partisipante 1.400.

“kada Munisípiu inan-feton ho totál 100. Partisipante ba análiza ne’e inan-feton ho tipu inan solteira, inan viuva, inan-feton ho defisénsia, vendedores ho eskala ki´ik, sobrevivente krime pasadu no violénsia bazeia ba jéneru no mós inan-feton sira ho orientasaun LBT,”, dehan Prezidente Rede Feto Timor Leste, Judite Dias Ximenes iha konferénsia imprensa iha sede Rede Feto, Obrigadu Barak, Dili, sesta ne’e.

Nia hatutan, objetivu hosi análiza ida-ne´e mak buka atu hatene sira-nia asesu ba subsídiu ne´e rasik inklui nia prosesu tomak no mós atu hatene ho klean oinsá impaktu hosi osan subsídiu ne’ebé uma-kain simu hodi rekoopera sira-nia família nia ekonómia no subsídiu ne´e empodera duni feto nia ekonómia ka lae.

Tuir nia, ninia metodolójia mak sei halo entrevista ba alvu ka partisipanate sira no mós métodu diskusaun grupu fogál ho alvu no mós ho autoridade lokál no sosiedade sivíl sira.

Tanba durante ne’e, nia dehan, pandemia COVID-19 ne’e Timor Leste mós la sees hosi situasaun ida-ne’e, nune’e ezije Estadu Timor-Leste deklara Estadu Emerjénsia (EE) dala-3, renova kada fulan, hahú hosi fulan marsu–juñu 2020, hodi limita populasaun nia movimentu inklui feto no ema vulneravél sira-nia asesu no involvimentu iha setór hotu-hotu.

Ho ne’e, nia dehan, ema barak lakon servisu no atividade ekonómika ne’ebé mak paradu hotu, servisu laiha, produsaun la iha, no laiha rendimentu tanba roda ekonómia paradu ne’ebé implika tebes ba sustenta família loro-loron nian durante fulan tolu (3). Ho ne’e, Governu iha polítika di´ak hodi oferese subsidiu $200 hodi ajuda rekopera familia nia ekonomia ba Estadu Emerjénsia. 

“Rede Feto Timor-Leste hanesan Organizasaun sumbriña ba Organizasaun Feto 44 rejistrada iha Timor-Leste ho nia funsaun mak fasilita, koordena no hakbiit knaar hodi promove igualidade jéneru liuhosi advokásia, rede servisu, kapasitasaun, monitorizasaun, hametin instituisaun no akontabilidade. Atu asegura Feto Timor Leste ne’ebé livre duni hosi violénsia no forma diskriminasaun hotu-hotu, hodi partisipa efetivamente iha prosesu dezenvolvimentu ne’ebe inkluzivu no sustentável,” Prezidente Rede Feto ne’e dehan.

Ho nune´e, Rede Feto Timor-Leste hodi fó sai ba públiku, aumezmu tempu fo koñesimentu ba autoridade sira, Polísia Nasionál Timor Leste (PNTL), Asosiasaun Feto Potensiál, Konsellu Suku no Asosiasaun Ema ho Defisiénsia, atu fó apoiu no servisu hamutuk hodi realiza programa monitorizasaun ba respondente tuir alvu ne’ebé hala´o hosi organizasaun membru Rede Feto iha munisípiu13 ho arquiris mak hanesan.
1. Munisípiu Aileu responsabiliza hosi Asosiasaun Emprezariál Feto Timor-Leste (AEMTL)
2. Munisípiu Ainaro responsabiliza hosi Organizasaun Feto Hadomi Familia (FHF)
3. Munisípiu Baucau responsabiliza hosi Organizasaun Populár Feto Timor-Leste (OPMT-sigla Portugés)
4. Munusipiu Bobonaro responsabiliza hosi Organizasaun PRADET
5. Munisípiu Covalima responsabiliza hosi Organizasaun Forum Komunikasaun Feto Timor –Lorosa’e (FOKUPERS),
6. Munisípiu Dili responsabiliza hosi WWCTL ho ARQUIRIS
7. Munisípiu Ermera responsabiliza hosi Fundasaun Feto iha Kbiit Servisu Hamutuk (FKSH)
8. Munisípiu Lautem responsabiliza hosi Fundación Dar Amor (FUNDAMOR)
9. Munisípiu Liquisa responsabiliza hosi Grupo Feto Foinsa’e Timor Lorosa’e (GFFTL).
10. Munisípiu Manatuto responsabiliza hosi Organizasaun Movimentu Feto Foinsa’e Timor-Leste (MoFFe-TL).
11. Munisípiu Manufahi responsabiliza hosi SHC
12. Munisípiu Viqueque responsabiliza hosi Funadasaun ESPERANCA
13. Reziaun Autónoma–Oé-Cusse responsabiliza hosi FEEO.

Nia dehan sekretariadu Rede Feto mak sei fasilita, koordena no organiza prosesu tomak programa ida-ne´e realiza ho apoiu fundu ba Rede Feto Timor Leste.

Joralista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here