Profisionál Saúde Sentru Saúde Gleno hala’o hela atendimentu ba pasiente. Imajen Tatoli/António Gonçalves

ERMERA, 10 jullu 2020 (TATOLI) – Xefe Sentru Saúde Gleno, Munisípiu Ermera, José de Carvalho, hateten profisionál saúde sira ne’ebé daudaun ne’e hala’o knaar iha Sentru Saúde Gleno sei la abandona sira nia knaar tanba de’it suplementu remuneratóriu ka subsídiu tanba antes atu serví komunidade sira halo ona juramentu.

“Ami promete katak ami sei la abandona ami-nia serbisu, tanba ne’e ami nia knaar rasik bazeia filafali ba ami-nia knaar hanesan médiku, enfermeiru, no parteira bainhira simu kna’ar ne’e, ami halo ona juramentu katak prontu serví no ami to’o agora seidauk halo reasaun ruma, maski iha duni planu atu halo maibé atu reklama de’it ami nia direitu,” Responsável Sentru Saúde Gleno ba Agência Tatoli iha nia serbisu fatin, Sentru Saúde Gleno, Munisípiu Ermera, sesta ne’e.

Xefe Sentru Saúde Gleno, Jose de Carvalho. Imajen Tatoli/António Gonçalves

Nia haktuir, loron hirak liubá profisionál saúde sira balun ameasa sei abandona serbisu bainhira Governu halo dezkriminasaun ba sira ligadu ho suplementu remuneratóriu ba pesoál saúde sira iha ámbitu prevensaun surtu COVID-19 iha Timor-Leste.

Nia dehan, to’o agora sira seidauk simu suplementu remuneratóriu.

“Ami seidauk simu subsídiu ne’e, ami rona katak sei transfere mai ami-nia konta bankária maibé ami-nia kolega sira balun ba check seidauk tama, ne’ebé ha’u dehan katak hein de’it kuandu tama ona agradese. Subsídiu ne’e ami tenke simu tanba Governu fó ona no orsamentu ne’e mós iha ona, ami rona barak mak halo protesta liuhosi konferénsia imprensa tanba distribuisaun la hanesan, ami iha ne’e la preokupa maibé ami husu atu labele hamosu diskriminasaun,” nia subliña.

Ofisiál Sentru Saúde Gleno hala’o hela atendimentu ba pasiente sira. Imajen Tatoli/António Gonçalves

José mós aviza ona ba profisionál saúde sira atu kontinua serví nafatin komunidade, trata komunidade ho dignu tanba liuhosi juramentu ne’ebé iha antes hala’o kna’ar ne’e katak sei serví komunidade no nasaun.

Iha Sentru Saúde Gleno iha médiku timor-oan na’in-10, médiku kubanu na’in-tolu, enfermeiru na’in-12, parteira na’in-ualu, tékniku laboratóriu haat, dentista ida, no aliadu sira, nune’e totál profisionál saúde iha sentru saúde ne’e hamutuk 54.

Bazeia ba rezolusaun Governu, Ministériu Saúde prevee montante fahe ba kategoria tolu no ne’ebé aplika ba profesionál sira ne’ebé konsidera hanesan liña frente no nia pagamentu sei sura kada loron.

Pagamentu $25 ba sira ne’ebé servisu iha fatin izolamentu no laboratóriu, $20 ba sira ne’ebé serbisu iha kuarentena no mós $15 ba sira ne’ebé serbisu iha administrasaun ka sira ne’ebé apoiu maibé laiha kontaktu direta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here