Enkontru informál Reprezentante ONU iha Timor-Leste, Roy Trivedy hamutuk ho ekipa no Primeiru-Ministru, Taur Matan Ruak, iha Palásiu Governu, sesta (10/07). Imajen/Mídia-GPM

DILI, 10 jullu 2020 (TATOLI) – Reprezentante Oganizasaun Nasaun Unida (ONU) iha Timor-Leste, Roy Trivedy, hamutuk ho ekipa hala’o enkotru ho Primeiru-Ministru (PM), Taur Matan Ruak hodi ko’alia kona-ba impaktu COVID-19 ba Timor-Leste no oinsá atu buka solusaun hodi apoia Governu.

Ekipa ne’e kompostu husi Reprezentante Organizasaun Mundial Saúde (OMS), Rajesh Pandav, Remprezentante United Nations Children’s Fund (UNICEF), Valerie Taton, Reprezentante Programa Ai-han Mundiál (WFP, sigla inglés), Dageng Liu, Reprezentante Programa Nasaun Unida ba Dezenvolvimentu, Munkhtuya Altangerel inklui Reprezentante UN Women, Sunita Caminha.

“Ami ohin loron hasoru ho Primeiru-Ministru hodi ko’alia kona-ba prioridade situasaun polítika iha país Timor-Leste no impaktu COVID-19 ba sosiu ekonómiku, planu estabilizasaun, seguransa ai-han, ekonomia, edukasaun, saúde no asuntu  koopersaun bilaterál no multilaterál nian,” dehan Reprezentante ONU iha Palásiu Governu, sesta ne’e.

Nia haktuir, iha ekontru ne’e nia parte mós hato’o ba Xefe Governu kona-ba papél ONU nian iha Timor-Leste ne’ebé ajuda sidadaun sira, enkuantu PM hato’o katak daudaun ne’e Governu forma ona ekipa Rekuperasaun Ekonómika no halo hela esforsu hodi rekupera ekonomia no kreximentu ekonomia bele la’o ho normál.

“Entaun ami mós ajuda Governu iha área seguransa ai-han, suporta agrikultór sira no fó suporta ba kestaun manufatura hodi ajuda joven sira no Governu iha área edukasaun hodi rekopera fali ekonomia iha rai-laran,” Roy Trivedy akresenta.

Biban ne’e, nia parte apresia tebes ba esforsu Governu ne’ebé maka daudaun ne’e halo ona planu oin-oin hamutuk ho parte parseiru dezenvolvimentu sira, nune’e ONU promete kontinua ajuda Governu hodi fó suporta ba realizasaun planu sira.

“Iha mundu tomak situasaun agora daudaun difísil tebes tanba empreza barak ne’ebé maka enfrenta situasaun oin-oin, tanba ne’e iha Timor-Leste ita hotu presiza hamutuk hodi bele suporta no kontribui ba rekoperasaun ekonomia,” nia subliña.

Nia parte mós felisita parte mídia nasionál sira tanba nia nota durante implementasaun Estadu Emerjénsia no krize surtu COVID-19 bele ajuda divulga informasaun kona-ba lala’ok situasaun atuál, maski hasoru difikuldade oin-oin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here