Dezeñu Konstrusaun Projetu Pelican Paradise iha área Tasi-Tolu. Imajen/Espesiál

DILI, 10 jullu 2020 (TATOLI) Sekretáriu Estadu Ambiente, Demétrio do Amaral de Cavalho, informa prazu lisensa abientál ba empreza Pelican Paradise nian sei ramata iha novembru tinan ne’e, tanba ne’e parte Sekretaria Estadu Ambiente (SEA) husu empreza atu hato’o relatóriu servisu, atu nune’e Governu bele avalia hodi halo renovasaun ba lisensa ambientál.

“Pelican Paradise nian lisensa sei ramata iha loron 9 novembru 2020, tanba ne’e ami fó hanoin ba sira atu hatama sira-nia relatóriu progresu servisu nian, atu ami iha baze dadus ruma hodi haree saida maka sira halo ona, keta iha buat ruma presiza hadi’a maka ita presiza fó hanoin. Ita presiza dezenvovimentu maibé ita mós presiza kuidadu ita-nia ambiente,” dehan Sekretáriu Estadu Demétrio hafoin halo vizita ba fatin kontrusaun otél husi empreza Pelican Paradise, Tibar, sesta ne’e.

Nia esplika, iha kestaun lisensa ambientál ne’ebé parte empreza sira tenke kumpre maka   dokumentu importante hanaran planu jestaun ambiente, ne’ebé akumula planu hotu, sei iha mudansa ruma iha metigasaun halo nusa, akontese problema ambientál ruma karik halo redusaun halo nusa, karik ne’e iha planu jestaun ambiente.

“Planu jestaun ambiente tinan-rua ka tolu bele muda. Entaun tanba ne’e maka lisensa ambientál ne’e ita emite ba tinan-rua, hafoin iha renovasaun lisensa kada tinan-rua. Iha dokumentu ne’ebé maka ami aprova no halo avaliasaun, ami hateten katak presiza iha kondisaun mínimu hodi bele hetan lisensa maka ita emite lisensa,” nia akresenta.

Tanba ne’e, komisaun avaliasaun impaktu  ambientál sei avalia dokumentu hafoin emite lisensa ambientál.

“Lisensa ambientál bainhira ami atribui ona maka sira sei hetan prosesu ne’e, ita trata hotu hanesan ba emprezáriu hotu. Pelican Paradise nian dokumentu ba projetu iha tinan balun nian laran tékniku sira halo avaliasaun no konsultasaun públiku maka ita emite lisensa ba sira,” nia subliña.

Nia nota katak, durante ne’e planu jestaun ambiente iha mundu bele dehan zero emisaun difísil atu hetan, nune’e mós ba impaktu ambientál.

Tanba ne’e, lisensa ambientál ne’e sempre prevee dehan iha problema ambintál 1 to’o 2 ka 3 iha planu metigasaun hodi jere problema sira ho didi’ak iha planu jestaun.

Iha fatin hanesan, Diretór Pelican Paradise, Jerimias Chan, hateten sira prontu submete filafali sira-nia dokumentu inklui relatóriu servisu ne’ebé durante ne’e empreza halo.

“Ami submete filafali dokumentu hodi halo renovasaun ba lisensa ambietál, tanba lisensa ambientál sei ramata iha tinan ne’e,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here