Xefe Estadu Maiór, Koronél Calisto Santos “Coliati” despede membru Komponente Navál F-FDTL na’in 25 ne’ebé sei ba tuir formasaun iha Austrália iha Komandu Komponente Navál Hera. Imajen/Dok. Tatoli

DILI, 10 jullu 2020 (TATOLI) – Komandu FALINTIL-Forsa Defeza Timor-Leste (F-FDTL), ohin, iha Kuartél Jenerál F-FDTL, Fatuhada, Dili, ofisiálmente promove diviza soldadu na’in—136 nian ba postu kabu.

Serimónia promosaun diviza ne’e  lidera hosi Xefe Estadu Maiór F-FDTL, Koronél Calisto Santos “Coliati”, hodi tau diviza postu kabu ba soldadu feto na’in-sia (9) no mane na’in-127.

Tuir despaxu 01/2020 lista militár promove ba postu kabu no tuir akordu lei númeru 4 artigu 84 iha dekretu lei númeru 28/2016, 13 jullu hosi alterasaun ba dekretu lei númeru 7/2014,12 marsu estatutu militár F-FDTL deklara kompete hosi Xefe Estadu Maiór F-FDTL liuhosi despaxu promove militár sarjentu no prasa.

Xefe Estadu Maiór F-FDTL, Koronél Calisto Santos, promove fó diviza ne’e liu analiza prosesu individual ba militár sira ne’e promove respetiva no kondisaun jerál no espesiál ba promosaun determina hodi promove soldadu hirak ne’e ba postu kabu ho eskolla konforme númeru 1,2,3 iha artigu 52 no alínea a, b, c iha artigu 6, efeitu apartir hahú iha loron 10 jullu 2020.

Xefe Estadu Maiór F-FDTL, Koronél Calisto Santos hateten, promosaun komandu nian ho nia sentidu atu fó rekoñesimentu ba militár promovidu hotu ba méritu, profisionalizmu, kometimentu, disiplina hanesan militár ne’ebé haknaar aan iha instituisaun.

“Ita boot sira hakat tan pasu ida ho pasu ne’ebé aumenta responsabilidade hanesan militár,” afirma Xefe Estadu Maiór F-FDTL, Koronél, Calisto da Costa “Coliati” iha nia diskursu.

Nia hateten, pasu hakat ba oin, la’ós ho de’it postu kabu, maibé depende ba promovidu ida-idak sira nia kapasidade, kometimentu, integridade pesoál no disiplina mak sei determina pasu iha futuru atu hakat tan.

“Hahú ba oin kaer metin regulamentu disiplina militár mak hanesan fatór determinante to’o ba iha futuru hodi kumpre nafatin hanesan ema militár ba lutu nasaun nian,” afirma Koronél Coliati.

Membru F-FDTL soldadu na’in-136 ne’ebé promovidu ba postu kabu kompostu hosi komponente Terrestre na’in-22, komponente Naval na’in-45, CAS komponente apoiu Servisu na’in-23, CFT (Componente Formasaun Treinu) na’in-18, Unidade Polísia Militár nain-12 no Unidade Kuartél Jerál na’in-16.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here