Xefe Operasaun Polísia Munisípiu Aileu, Inspetór Xefe Helio da Coinceção de Deus. Imajen/Eugénio Pereira

AILEU, 10 jullu 2020 (TATOLI- Durante janeiru too jullu 2020, kazu violénsia doméstika rejistu aas iha Polísia Munisípiu Aileu.

Xefe Operasaun Polísia Munisípiu Aileu, Inspetór Xefe Helio da Coinceção de Deus dehan, númeru kazu violénsia doméstika tinan ne’e rejista aas iha Aileu tanba kauza hosi problema ekonomia uma-laran no problema sosiál.

“Kazu violénsia doméstika rejista aas iha Komandu Polísia Aileu ho númeru 29, tuir fali kazu asalta malu entre grupu juventude ne’ebé rejista kazu 15,” hateten Inspetór Xefe Helio  de Deus, ohin, hodi responde  ba Agência Tatoli iha Komandu PNTL Aileu.

Atu hamenus númeru kazu ne’e, membru  polísia Aileu hamutuk na’in-124 liuhosi Veneravel Person Unit (VPU) servisu hamutuk ho Ofisiál Polísia Suku (OPS) ne’ebé destaka iha Suku 33 iha Aileu koopera ho grupu organizasaun feto sira kontinua sensibiliza programa lei violénsia doméstika nian ba komunidade.

“Ami nia VPU no OPS sira ne’ebé destaka iha suku 33 kontinua sensibiliza informasaun ba komunidade sira oinsá maka halo aproximasaun ba komunidade koopera luta kontra violénsia doméstika,” nia hateten.

Nia hatutan, ba kazu violénsia doméstika ne’ebé tama iha grau krime, VPU Aileu sempre halo investigasaun depois aprezenta ba Ministériu Públiu hodi prosesa no kazu balun VPU no OPS rezolve tuir dalan mediasaun iha família laran no parte sira simu malu no badame malu.

Inspetór Xefe, Helio hatutan, kazu seluk tan ne’ebé sira rejista durante fulan hitu nia laran maka problema asaltu malu entre grupu joven sira dala ruma hemu tua hamosu problema, maibé PNTL sempre too fatin buka solusaun husu joven sira hadame malu hodi hametin unidade.

 “Ami mós  rejista kazu asidente tráfegu hamutu 46,” hateten Helio de Deus.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here