Estudante Sekundáriu Nino Konis Santana Gleno. Imajen Tatoli/António Gonçalves

ERMERA, 10 jullu 2020 (TATOLI) Governu liuhosi Ministériu Edukasaun, Juventude no Desportu (MEJD), iha loron 02 jullu 2020 re-ativa prosesu aprendizajen ba eskola sira iha territóriu tomak.

Tanba ne’e, iha Eskola Sekundária (ES) Nino Konis Santana Gleno, Munisípiu Ermera mós re-ativa ona prosesu aprendijazen iha segunda (06/07).

“Ministériu Edukasaun, Juventude no Desportu  (MEJD) no Ministériu Saúde (MS) mai ona halo abertura ba ami nia eskola hodi ami hahú hikas prosesu aprendijazen, ami aplika regra sira ne’ebé halo prevensaun ba COVID-19 ne’e. Estudante sira ne’ebé mai mak la uza máskara, ami haruka fila,” relata Diretór ES Nino Konis Santana Gleno, Asen Martins Oliveira ba Agência Tatoli iha ninia knaar fatin, Gleno, Munisípiu Ermera, sesta ne’e.

Diretór Eskola Sekundáriu, Nino Konis Santana Gleno, Asen Martins Oliveira. Imajen Tatoli/António Gonçalves

Relasiona ho medida prevensaun sira ne’e maka iha sesta ne’e, Dirijente eskola konvoka reuniaun alargada ho inan-aman husi estudante sira hodi esplika saida maka atu aplika, aleinde kona-ba sosa rasik máskara, iha reuniuan ne’e mós esplika kona-ba limitasaun sala aula eskola ne’e nian.

Nia haktuir, antes hahú hikas prosesu aprendijazen, estudante sira halo limpeza no parte eskola prepara kritéria hitu nu’udar pontu importante hanesan iha eskola tenke iha bee moos hodi hamoos eskola lorloron, tenke iha fatin fase liman ho bee no sabaun iha kada sala aula, tenke iha fatin soe foer, profesór tenke pasa ona ezame teste ba COVID-19 via online, estudante hotu tenke uze máskara, informasaun relasiona ho COVID-19 taka iha kada sala aula, ikus liu mak prátika distansimentu sosiál kada sala aula.

Estudante Sekundáriu Nino Konis Santana Gleno. Imajen Tatoli/António Gonçalves

“Bee ne’ebé uza hodi fase liman tau iha balde mak tau iha sala aula sira, bee ne’ebé ami uza ne’e mós dala ruma sulin dala ruma la sulin, tanba ne’e maka ami prepara bee posu kuandu bee torneira la mai ami-nia seguransa no pesoál limpeza ense bee hodi uza,” nia akresenta.

Responsável ne’e dehan, totál estudante iha eskola ne’e hamutuk 2.427, tanba ne’e ho númeru boot tebes presiza uza máskara, parte eskola prepara la sufisiente no husu atu prepara rasik.

Antes ne’e, kada sala aula akumula estudante mínimu 60 no másimu 80, ho prevensaun COVID-19 deside kada sala aula akumula estudante na’in-30.

Estudante Sekundáriu Nino Konis Santana Gleno. Imajen Tatoli/António Gonçalves

Tanba sala aula la sufisiente atu akumulu estudante ne’ebé barak no eskola sei aplika distansiamentu sosiál, maka kada semana estudante sira tama loron rua de’it ba kada klase no loron sira seluk estudante husi klase seluk mak okupa.

“Estudante barak ne’ebé tuir aula loron rua-rua de’it, iha segunda ba de’it estudante désimu segundu ano (siénsia teknolojia dader, siénsia sosiál lokraik) iha tersa no sesta ba estudante désimu primeiru ano, iha loron kuarta no sábadu ba estudante désimu ano, ami nia sala hamutuk hitu de’it ne’ebé la to’o,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here