DILI, 10 jullu 2020 (TATOLI)–Conselho de Imprensa (CI) ho nia parseiru Centro Nacionál Chega (CNC), ohin, lansa prémiu jornalizmu ba pás ka prémiu ‘Maria Gorete’
Diretór Ezekutivu CNC, Hugo Maria Fernandes, hateten objetivu lansa prémiu ida-ne’e tanba fó omenajén ba Saudoza ‘Maria Gorete’ ne’ebé nu’udar feto ida kontribui nia luta ba Timor-Leste ninia ukun rasik-aan hahú funu hosi 1974-1999.
“Hanesan ema hotu hatene ‘Maria Gorrete’ kompaneira luta-na’in ida ne’ebé mak hahú hosi períodu funu luta ba Timor-Leste ninia ukun rasik-aan. Nia hahú involve-aan ba klandestina maibé depois 1999 ema Indonézia sira kaer lori lakon de’it. Entaun, ita fó omenajén ida ba saudoza kamarada ‘Maria Gorete’ ne’ebé maka dezempeña nia apoiu tomak ba luta ida-ne’e tanba nia objetivu ne’e ba pás nian,” dehan Hugo Maria Fernandes ba jornalista sira hafoin ramata programa induzaun ba jornalista sira ho tema “Hasa’e Kunesimentu Jornalista Sira Kona-ba Retatóri Chega! no Per Memoriam Ad Spem, Hodi Promove Pás no Proteje Direitu Umanu” iha salaun konferénsia CNC, Balide, Dili, sesta ne’e.
Nia hatutan, prémiu ne’e lansa ba jornalista hotu-hotu oinsá mak haree ba jornalista sira-nia públikasaun relasiona kria paz, mantein paz, promove paz no mós ba direitu báziku sira seluk hanesan ba ai-han, saúde no edukasaun.
Diretór ne’e subliña, prémiu ne’ebé ohin lansa fó tempu fulan tolu ba jornalista sira submete sira-nia obra depois haruka ba iha Conselho de Imprensa no CNC hodi halo prosesu selesaun no iha fulan outubru mak fó sai manan na’in sira-nia naran.
“Agora fulan jullu ona. Haree, hosi jullu to’o outubru, iha jornalista hira mak submete sira-nia obra mai iha Conselho de Imprensa ho CNC hosi prosesu selesaun kritéria. Iha fulan outubru, bainhira komemora loron Balibo-5 mak ita sei anúnsia jornalista sé de’it mak sai manan-na’in ba kategória prémiu ba jornalizmu ba pás ka prémiu Maria Gorete nian,” nia dehan.
Nia hateten, kritéria ne’ebé jornalista sira atu kompete ba prémiu jornalizmu ba pás ka prémiu ‘Maria Gorrete’ mak jornalista sira kobre notísia kona-ba promove pás, konflitu, rekonsiliasaun istória pasadu nian, no mós kobertura kona-ba ema-nia direitu báziku sira hanesan edukasaun, saúde, no asesu ba bee-moos.
“Importante kritériu hosi prémiu ‘Maria Gorete’ ne’e nia formatu maka foka liu ba produtu jornalizmu ho karater feature ka dokumentáriu ne’ebé di’ak liu kona-ba asuntu pás no protesaun diretu umanu, hodi harii sosiedade ne’ebé moris hakmatek nunue’e bele fó biban ba dezenvolvimentu. Ha’u hanoin ida-ne’e ba meiu komunikasaun hotu-hotu ba rádio, televizaun, online, no mídia imprime no revista hotu,” nia dehan.
Aleinde lansa prémiu ‘Maria Gorete’ ba jornalista sira, nia dehan, CI no CNC lansa mós nota intendimentu ‘Hasa’e Koñesementu jornalista sira kona-ba relatóriu CAVR “Chega!” no CVA “Per Memoriam As Spem” hodi promeve paz, proteje Diretu Umanu’ ida-ne’e, dahuluk halo indizaun ba jornalisa sira kona-ba saida maka iha relatóriu CAVR ne’e no saida maka agora CNC halo.
“Loron ohin ne’e mós loron istóriku hotu ba entidade rua mak Conselho de Imprensa no Centro Nacional Chega tanba iha tinan kotuk CNC ho CI asina nota intendimentu bazeia ba rekomendasaun ida hosi relatóriu Chega CAVR nian atu kontinua fó apoiu ba jornalizmu liuliu ba jornalista sira para kontinua sai ajente ba harii pás iha no ba Timor-Leste,” nia dehan
Aleinde iha prémiu jornalizmu ba pás (Maria Gorete), durante ne’e Conselho Imprensa realiza ona programa prinsipál neen (6) ne’ebé kada tinan sempre atribui hodi hadi’a kulidade produtu jornalístiku no hamentin kredibilidade iha públiku maka hanesan Prémiu Conselho de Imprensa, Adelino Gomes, Francisco Borja da Costa, Greg Shackleton, Bernardino Guterres, no prémiu UNICEF.
Jornalista : Osória Marques
Editór : Cancio Ximenes
