Diretora Jerál Autoridade Tributária Timor-Leste (ATTL), Mónica Rangel da Cruz. Imajen Tatoli/Florêncio Miranda Ximenes

DILI, 10 jullu 2020 (TATOLI) – Ministériu Finansa (MF) liuhosi Autoridade Tributária Timor-Leste (ATTL) no Banku Sentrál Timor-Leste (BCTL, sigla portugés) dezenvolve sistema aplikasaun ba pagamentu impostu online ho sistema P-24 hodi fasilita kontribuente no emprezáriu sira, nune’e bele hasa’e reseita doméstika.

Diretora Jerál Autoridade Tributária Timor-Leste (ATTL), Mónica Rangel da Cruz, informa ekipa tékniku ATTL no BCTL servisu hamutuk hodi dezenvolve no tama ona faze finalizasaun ba sistema pagamentu impostu online ne’e.

“Ami husi Autoridade Tributária servisu hamutuk ho BCTL ne’ebé lidera husi Vise-Governadór Banku Sentrál, ne’ebé iha faze finalizasaun atu nune’e bele promove sistema P-24 katak pagamentu ba tipu impostu sira bele asesu direita husi ita-nia ATM sira iha kualkér banku sira iha Dili no mós Munisípiu sira,” tenik Diretora Jerál ne’e iha edifísiu Ministériu Finansa, Aitarak-Laran, sesta ne’e.

Ho nune’e, nia dehan, planu implementasaun sistema kuandu finaliza ona Ministériu Finansa hamutuk ho ATTL no BCTL komprometidu atu informa ba públiku.

Liuhosi meiu ne’e, tuir nia atu moderniza reforma fiskál liuhosi sistema pagamentu impostu online ba prosesu administrasaun.

Sorin seluk, Vise-Ministra Finansa, Sara Lobo Britas, reforsa atu moderniza sistema pagamentu, Autoridade Tributária hahú dezenvolve sistema pagamentu impostu atu hadi’a mekanizmu pagamentu no fasilita kontribuente ho lais bainhira hala’o pagamentu.

“Espera katak iha tempu badak Autoridade Tributária sei servisu hamutuk ho BCTL no banku komersiál sira seluk hodi bele konklui, nune’e ita bele halibur malu filafali hodi halo lansamentu ba publiku,” dehan governante ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here