Ilustrasaun impostu. Imajen/Espesiál

DILI, 10 jullu 2020 (TATOLI) – Diretora Jerál Autoridade Tributária Timor-Leste (ATTL), Mónica Rangel da Cruz, informa durante Estadu Emerjénsia ba prevensaun no kombate surtu COVID-19, hahú husi abríl to’o juñu konsege rekolla reseita doméstika husi impostu indireta hamutuk millaun $10.

“Iha Estadu Emerjénsia nia-laran ne’e, hafoin verfikasaun katak pagamentu seidauk la’o hotu, maibé totál reseita ne’ebé rekolla purvolta millaun $10 mak ita kobre nafatin husi  konbribuente balun ne’ebé selu impostu normál,” tenik Diretora Jerál ne’e iha edifísiu Ministériu Finansa, Aitarak-Laran, sesta ne’e.

Nia dehan, reseita hirak ne’e Autoridade Tributária kobre husi impostu indireta tuir lei Tributária hanesan tipu impostu kona-ba sálariu, impostu retensaun na fonte, impostu sobre servisu no impostu rendimentu.

“Ami jere ba impostu indireitu sira ka impostu fiskál tanba impostu diretu ne’e jere husi Autoridade Aduaneira,” nia akresenta.

Durante surtu COVID-19 Autoridade Tributária kontinua fó asisténsia normál ba kontribuente no kliente sira hodi hatama submisaun no relatóriu mensál no annuál.

“Ita-nia pagamentu impostu ita fó estensaun ba fulan-rua, katak pagamentu impostu ba fulan-marsu to’o abríl ita fó estensaun to’o iha 31 maiu, ne’ebé prosesu pagamentu impostu kontinua la’o,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here