Atividade Petrolífera iha Kampu Bayu-Undan. Imajen/ConocoPhillips

DILI, 09 jullu 2020 (TATOLI) – Relasiona ho pandemia globál COVID-19 ne’ebé afeta nasaun barak, Governu Timor-Leste liuhosi orgaun reguladór Autoridade Nasionál Petróleu no Minerál (ANPM) deside estende tan tempu ba konkursu públiku ba bloku hamutuk 18 to’o outubru 2021.

Antes ne’e, iha loron 3 outubru 2019, ANPM ho apoiu hosi IN-VR Oil & Gas realiza simeira internasionál kona-ba petróleu no gás Timor-Leste (Timor-Leste Oil & Gás Summit 2019) no husi seremónia ne’e Governu Timor- Leste liuhosi Primeiru-Ministru, Taur Matan Ruak lansa ona konkursu públiku ba mina no gás hamutuk bloku 18, kompostu husi 11 iha tasi-laran no hitu iha rai-maran.

Tanba ne’e, tempu ba konkursu públiku ne’e sei termina iha loron 9 outubru tinan ne’e, maibé Governu deside estende tan fulan-12 atu fó espasu tempu naruk ba investidór sira aplika no hatama dokumentu sira bainhira interese.

“Iha eventu konferénsia online ne’e, ita fó sai mós  anúnsiu ba sira kona-ba estensaun tempu ba konkorsu públiku tanba tuir loloos ita taka konkursu ne’e iha loron 9 outubru tinan ne’e, maibé situasaun COVID-19 ne’ebé afeta ba kompañia lubuk ida labele halo atividade preparasaun atu mai aplika iha kada bloku tanba sira tenke mai duni haree potensialidade mina no gás iha duni ka lae, bazeia ba dadus ne’ebé aprezenta ona,” tenik Diretór Esplorasaun no  Promosaun ANPM, Mateus da Costa iha edifísiu ANPM, Aitarak-Laran, kinta ne’e.

Razaun estende tempu ne’e, Tuir Diretór Mateus  katak kompañia sira ne’ebé interese atu investe presiza prenxe rekerimentu ka dokumentu lubuk  tanba la’ós kualkér kompañia bele aplika de’it.

“Ita hakarak simu kompañia ida ne’ebé halo duni atividade mina no gás, iha kapasidade tékniku no iha finanseiru,” nia subliña.

Diretór Mateus afirma tan Governu liuhosi ANPM mós halo konsultasaun ho nasaun 32, ne’ebé jeralmente halo estensaun ba sira nia konkursu públiku petrolífera tanba kauza husi pandemia globál.

“Ita haree situasaun sira ne’e maka ita estende ba fulan-12, signifika katak outubru tinan oin maka ita foin taka aplikasaun konkursu públiku ba bloku 18 ne’e,” nia akresenta.

Vantajen ba taka aplikasaun iha tinan-oin atu bele iha tempu barak tan ba kompañia sira seluk ne’ebé seidauk rona promosaun bele rona no kompañia sira ne’ebé iha interese ona iha tempu naruk atu halo estudu ba pontesialidade jeolojia ka mina no gás ne’e.

“Kompañia sira ne’ebé iha interese no asesu ona dadus husu ita atu estende tan tempu atu sira prepara-an didi’ak hodi aplika,” nia tenik.

Maski nune’e, Diretór ne’e dehan importante liu maka kontinua promove potensialidade hirak ne’e tanba lansa konkursu públiku ne’e la’ós Timor-Leste mesak de’it, maibé nasaun kuaze 32.

“Ita kompete malu ho nasaun barak tanba natureza merkadu, maibé ita tenke esforsu-an halo promosaun,” nia hatutan.

Antes ne’e, Prezidente ANPM, Gualdino da Silva, informa simu ona kontaktu husi kompañia nasionál no internasionál hamutuk 10-resin ne’ebé hatudu interese ba konkursu públiku bloku 18 mina no gás ne’ebé lansa ona husi Governu Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here