Bee Manas Marobo. Imajen Tatoli/António Gonçalves

DILI, 09 jullu 2020 (TATOLI) – Sekretaria Estadu Komunikasaun Sosiál (SEKOMS) hamutuk ho Sekretaria Estadu Formasaun Profisionál no Empregu (SEFOPE) hakarak halo servisu koordenasaun ba promosaun fatin turizmu komunitáriu ne’ebé antes ne’e SEFOPE halo ona nune’e bele hatudu Timor-Leste ba mundu katak iha fatin turizmu barak maka atrai no dada ema barak.

Bazeia ba Rezolusaun Konsellu Ministru númeru 24/2013, fó dalan ba SEFOPE atu implementa programa no hasa’e númeru empregu iha rai-laran, nune’e implementa ona programa turizmu komunitáriu iha fatin lima atu kria kampu traballu.

Fatin hirak ne’e maka hanesan Com iha Munisípiu Lautém, Mota Bandeira iha Munisípiu Ermera, Bee Manas Marobo iha Munisípiu Bobonaro, Rekiraka iha Munisípiu Viqueque no Seloi Kraik iha Munisípiu Aileu.

“Ami sei kolabora atu promove sítiu turíztiku ne’ebé maka durante ne’e SEFOPE dezenvolve ona, nune’e ita-nia populasaun hatene no bele ba vizita no hamenus ba rai-li’ur. Haree ba situasaun pandemia ne’e evita ita atu ba vizita ba ema-nia rai,” dehan Sekretáriu Estadu Komunikasaun Sosiál, Merício Juvinal dos Reis ‘Akara’, iha edifsiu SEFOPE, Caicoli, kinta ne’e.

Governante ne’e haktuir, pontu segundu ne’ebé maka SEKOMS no SEFOPE ko’alia maka atu husu disponibilidade Sekretáriu Estadu Formasaun Profisionál no Empregu, Alarico do Rosário atu ko’alia iha programa povu nian le’et liuhosi “Governu Ko’alia” hodi fo espasu ba SEFOPE para ko’alia kona-ba planu prioridade no vizaun.

Iha fatin hanesan, Sekretáriu Estadu Alarico do Rosário hateten enkontru ne’e ko’alia mós kona-ba futuru atu servisu hamutuk ne’ebé haree liu ba-kona ba sentru formasaun no deside bele iha koordenasaun ba turizmu komunitáriu atu promove ba públiku no haklaken iha mundu katak iha Timór mós iha fatin ne’ebé ho kualidade di’ak.

“Turizmu komunitáriu hanesan iha Seloi Kraik Aileu, bee manas Marobo no seluk tan durante ne’e ema la hatene maibé ho oportunidade ida ne’e SEKOMS bele hatudu ba públiku liuhosi mídia,” nia akresenta.

Governante ne’e konsidera, bainhira halo promosaun hanesan ne’e sei dada turizta estrajeiru no lokál sira atu ba vizita fatin turiztiku potensiál iha Timor-Leste.

Tuir nia, kolaborasaun sevisu ne’e atu haree mós  ba área sira hanesan fatin istóriku no fatin turizmu potensiál sira.

“Ami halo koordenasaun katak bainhira koopera ho SEKOMS sei servisu hamutuk hodi haree ba kualkéra área saida deit maka atu tulun malu ho servisu ida hodi foti rai Timor-Leste nian poténsia turizmu sira,” Alarico subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here