Sekretáriu Estadu Formasaun Profisionál no Empregu, Alarico do Rosário. Imajen Tatoli/Egas Cristovão

DILI, 09 jullu 2020 (TATOLI)Sekretaria Estadu Formasaun Profisionál no Empregu (SEFOPE) finaliza ona prosesu atu lori fila traballadór timor-oan na’in-106 ne’ebé kontratu mate ona inklui mate isin ida iha Korea Súl no daudaun hein de’it komunikasaun entre Ministériu Negósiu Estranjeiru no Kooperasaun (MNEK) ho Governu Korea.

Tuir Sekretáriu Estadu Formasaun Profisionál no Empregu, Alarico do Rosário, Governu iha responsablidade ba sidadaun sira iha rai-li’ur tanba ne’e maka SEFOPE aluga aviaun Citilink atu halo trasportasaun traballadór timor-oan sira hodi fila mai Timor-Leste.

“Prosesu administrasaun ba aviaun nian buat hotu SEFOPE rezolve hotu ona ho Ministeriu Finansas (MF), maibé agora prosesu atu mai maka kompenténsia MNEK maka bele rezolve ida ne’e. Tanba ita halo komunikasaun entre nasaun ida ho nasaun seluk liuhosi MNEK. Enkuantu SEFOPE ninian parte maka aranja osan atu transporta traballadór sira,” tenik Sekretáriu Estadu Alarico ba Agência Tatoli iha edifísiu SEFOPE, Caicoli, kinta ne’e.

Daudaun ne’e, hein transfere osan ba konta bankária aviaun Citilink nian maibé aviaun refere atu semo ba Korea Súl ne’e seidauk bele tanba ne’e maka seidauk determina loloos loron sira atu mai.

Nia dehan, husi parte Governu Korea rasik fó tempu ba Governu Timor-Leste to’o loron 10 jullu atu lori fila  traballadór timor-oan sira ne’ebé kotratu ramata ona.

“Ita husu to’o loron 19 jullu maibé ida-ne’e mós loron la fixu no hanesan tentativa ikus,” nia akresenta.

Tuir governante ne’e, sedu ka tarde traballadór sira sei to’o mai Timór tanba prosesu balun ne’ebé maka tenke kumpre hanesan ezemplu aviaun boot Korea nia labele mai direita iha Timor-Leste entaun tenke aluga fali aviaun sira husi Indonézia hodi bele tula pasajeiru 150 to’o 180.

Nia informa, juíz na’in-haat ne’ebé tuir hela formasaun iha Portugál no estudante timor-oan na’in-sanulu sei fila hamutuk traballadór timor-oan iha Korea.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here