Primeiru-Ministru, Taur Matan Ruak. Imajen Tatoli/Egas Cristovão

DILI, 09 jullu 2020 (TATOLI) – Relasiona ho profisionál saúde balun ne’ebé preokupa ho valór suplementu remuneratóriu ne’ebé Governu oferese durante prevene no kombate surtu COVID-19, Primeiru-Ministru (PM), Taur Matan Ruak , hateten  Governu fó tuir kapasidade finasieru ne’ebé iha.

“Ita-nia nasaun fó buat ne’ebé bele, la’ós buat ne’ebé ita hakarak tanba ita-nia mina folin tun no ita-nia fundu petrolíferu ne’e komesa menus, enkuantu ita-nia sidadaun aumenta,” tenik PM Taur hafoin enkontru semanál ho Prezidente Repúblika Francisco Guterres ‘Lú Olo’, iha Palásiu Prezidensiál, Bairro -Pité, kinta ne’e.

Governu aprova subsídiu ho kategoria tolu ba ekipa servisu prevensaun COVID-19, ne’ebé konsidera hanesan liña frente.

Pagamentu ne’ebé konta ba loron ida, iha fatin izolamentu simu $25, kuarentena $20 no mós servisu administrativa ka sira ne’ebé apoiu maibé laiha kontaktu direta ho kazu konfirmadu ho valór $15. 

“Ita fó buat ne’ebé iha, la’ós fó buat ne’ebé ita hakarak tanba Ita hotu hakarak boot no barak liu hanesan ita iha uma laran karik bikan nakonu, maibé ita tenke mós pasiénsia tanba ita fahe fali. Ita presiza haree nasaun tomak,” Xefe Governu subliña.

Sorin seluk, Vise-Ministru Saúde, Bonifácio Maucoli dos Reis, husu ba profisionál saúde sira iha Munisípiu Covalima atu servisu ho profesionál ba prevensaun no kombate surtu COVID-19 la’ós halo servisu tanba garante de’it ba suplementu remuneratóriu ne’ebé maka Governu oferese ona. 

“Nu’udár profisionál saúde antes ita hala’o servisu ita idaidak halo juramentu tiha ona ba kna’ar ne’ebé ita lori ida ne’e mak ita tenke kumpre, tanba ne’e ita bele ejize ita-nia direitu maibé ita-nia devér ita tenke hala’o ho responsabilidade,”dehan Maucoli. 

Maski nune’e, Bonifácio felisita médiku liña frente sira tanba fó ona kontribuisaun hodi prevene transmisaun moras Coronavírus iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here