Primeiru-Ministru, Taur Matan Ruak. Imajen Tatoli/Egas Cristovão

DILI, 09 jullu 2020 (TATOLI) – Governu liuhosi Ministériu Justisa (MJ) inisia ona proposta aditamentu ba artigu balun iha Kódigu Penál atu Kriminaliza aktu Difamasaun, tanba ne’e Primeiru Ministru (PM), Taur Matan Ruak husu atu sosiedade sira loke diskusaun ba inisiativa ne’e.

“Ha’u hakarak husik sosiedade ko’alia no diskute lai ezbosu lei ne’e, maibé ita tenke destingue entre demokrasia ho buat sira ne’ebé insulta no trata tanba ita-nia tradisaun no kultura inklui ukun fuan Maromak nia bandu ema trata no tolok ema seluk,” tenik PM Taur hafoin enkontru semanál ho Prezidente Repúblika, Francisco Guterres ‘Lú Olo’, iha Palásiu Presidenziál, Bairro-Pité, kinta ne’e.

Xefe Governu nota katak, tanba Timor-Leste adopta sistema demokrasia maka sosiedade atu trata no tolok maibé nia fó hanoin presiza hatene demokrasia ne’e hanesan sosiedade ida sivilizadu, edukadu no respeitu malu tanba sosiedade atu forte tenke respeita no fiar malu. 

“Ha’u husik tanba seidauk mai iha Konsellu Ministru no sei iha Minsitériu  Justisa, maski mai iha Konsellu Ministru mós nia tenke ba fali iha Parlamentu Nasionál atu halo diskusaun, ne’ebé ita hakarak haree maioria sidadaun nia opiniaun ne’e oinsá? tanba ita uza sistema demokrasia mak husik ema tolok arbiru ka hanusa?,” Xefe Governu subliña.

Artigu ne’ebé MJ inisia atu halo aditamentu maka artigu 187 A kona-ba Difamasaun no Insultu, artigu 187 B Hatodan, artigu 187 C Hafoer Kredibilidade Instituisaun Sira, 187 D Hafoer Ema ne’ebé Mate Ona, artigu 187 E Prova ba Verdade husi Faktu no artigu 187 F Publikasaun ba Desizaun Tribunál.

Parte ne’ebé hamosu liu diskusaun pro kontra husi entidade oinoin maka aditamentu ba artigu 187 A, ne’ebé mensiona bainhira ko’alia ho meiu komunikasaun ne’ebé dun-matak ema seluk halo buat ruma ka insulta ema nian dignidade no fahe tutan akuzasaun ka opiniaun ida ba ema seluk, sei kastigu ho prizasaun to’o tinan 1 ka multa.

Nune’e mós, kastigu hanesan sei aplika mós ba sé de’it iha vítima nian oin, hasai liafuan, prátika ka akuza faktu seluk ne’ebé hatun dignidade no ninian opiniaun.

Maski nune’e prosesu penál ne’ebé sei aplika depende ba keixa husi vítima.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here