iklan

NASIONÁL, DILI, HEADLINE, LEI, SEGURANSA

PM Taur Bolu Atensaun Ba Ofisiál Superiór PNTL Atu Kumpre Ierarkia

PM Taur Bolu Atensaun Ba Ofisiál Superiór PNTL Atu Kumpre Ierarkia

Primeiru-Ministru no Ministru Interiór, Taur Matan Ruak akompaña hosi Vise Ministru Interiór António Armindo no Komisáriu Faustino da Costa, hasai retratu hamutuk ho ofisiál superior PNTL, kinta (09/07/2020). Imajen/Eugénio Pereira.

DILI, 09 jullu 2020 (TATOLI- Primeiru-Ministru no Ministru Interiór, Taur Matan Ruak, bolu atensaun ba Ofisiál Superior Polísia Nasionál Timor-Leste (PNTL) atu kuidadu aan ho di’ak no servisu kumpre regra no ierarkia komandu nian hodi hametin Instituisaun PNTL nu’udar forsa ida profisionál.

Notísia Relevante : PM Taur Dezafia MI ho Komandu PNTL Servisu Kumpre Ierarkia no Dixiplina

Xefe Governu Taur Matan Ruak afirma atensaun ida ne’e bainhira hamutuk ho Vise Ministru Interiór, António Armindo no Komandante Jerál PNTL, Komisáriu Faustino da Costa, Segundu Komandante Komisáriu Mateus Fernandes hala’o enkontru ho Ofisiál Superiór PNTL no komandante polísia munisípiu 12 ho Rejiaun Administrativu Espesiál Oe-Cusse Ambeno  (RAEOA), ohin, iha Kuartél Jerál PNTL, Caicoli, Dili.

Iha enkontru durante oras rua liu nia laran ne’e, Vise Ministru Interiór  António dehan, PM Taur transmite ba komandante PNTL sira oinsá servisu ho dixiplina, kumpre regra no ierarkia hodi lori Instituisaun PNTL sai forsa independente serbí povu no nasaun RDTL.

“Primeiru-Ministru ko’alia barak liu kona-ba dezenvolvimentu instituisaun PNTL ba futuru, oinsá lori PNTL atu servisu ho profisionalizmu no servisu koopera ho nasaun seluk,”  informa  António Armindo ba jornalista sira.

Nia hatutan, durante enkontru, PM Taur mós husu atu PNTL identifika problema sira infraestrutura ne’ebé seidauk hadi’a atu bele prevee iha proposta Orsamentu Jerál Estadu (OJE) 2021.

Iha fatin hanesan, Komandante Jerál PNTL, Komisáriu Faustino da Costa dehan, mensajen ne’ebé PM Taur hato’o ba komandante sira nu’udar xave importante atu komandante sira kaer metin no servisu ho profisionál.

“Iha buat importante tolu maka Primeiru-Ministru hato’o ba PNTL, dixiplina ne’e primeiru kedas, segundu fiar ierarkia no terseiru maka hato’o komandante sira tenke sente katak, ohin loron komandante sira sai komandante unidade ida tenke di’ak atu kaer instituisaun hodi halo di’ak liu,” Komisáriu Faustino da Costa hateten.

Nia hatutan, PM Taur mós husu atu membru PNTL hotu iha munisípiu no unidade hotu- hotu atu garante nafatin estabilidade seguransa iha rai laran.

Jornalista   : Eugénio Pereira

Editór        : Francisco Simões

iklan
iklan

Leave a Reply

iklan
error: Content is protected !!