Ministru Obra Públika, Salvador Eugênio Soares dos Reis Pires halo enkontru informál ho Prezidente CCI-TL, Oscar Lima, iha edifísiu MOP, Caicoli, kinta (09/07). Imajen/Mídia-MOP

DILI, 09 jullu 2020 (TATOLI) – Ministru Obra Públika, Salvador Eugênio Soares dos Reis Pires hala’o enkontru kortezia ho Prezidente Kámara Komérsiu no Industria Timor-Leste (CCI-TL, sigla portugés), Oscar Lima hodi diskute kona-ba kooperasaun servisu iha setór públiku ba dezenvolvimentu iha Timor-Leste.

Enkontru ohin ami ko’alia kona-ba asuntu liga ba kooperasaun entre Ministériu Obra Públika (MOP) ho CCI-TL, ne’ebé hanesan uma mahon ba empreza nasionál atu hadi’a servisu di’ak liután iha setór privadu sira nian,” tenik Ministru Salvador hafoin enkontru iha edifísiu MOP, Caicoli, kinta ne’e.

Iha enkontru ne’e, Ministru Salvador haktuir parte Kámara Komérsiu hato’o preokupasaun lubuk ida hanesan implementasaun dekretu-lei pre-kualifikasaun no pagamentu ba obra sira ne’ebé la’o tarde inklui kontratuál ne’ebé prejudika empreza nasionál sira.

“Ita bele servisu hamutuk ho CCI-TL hodi identifika kapasidade finaseira, esperensia no klasifika empreza sira atu bainhira iha promosaun projetu ita bele fó konvite bazeia ba klasifikasaun ne’ebé ita halo ona no kapasidade finaseiru reál ne’ebé empreza sira iha,” nia subliña.

Notísia Relevante: Projetu 142, MOP Finaliza Pagamentu ba Obra Hamutuk 94 ho Kustu Millaun $114

Iha sorin seluk, Prezidente CCI-TL, Oscar Lima, konsidera enkontru traballu ne’e importante tebes atu informa lala’ok emprezáriu sira ba ministru tanba emprezáriu barak mak moris depende de’it ba projetu konstrusaun sira husi Governu liuhosi MOP.

“Ami hanoin importante tebes atu trata mak implementa ona dekretu-lei pre-kualifikasaun  tanba ita iha ona lejizlasaun, maibé ami husu ba Ministru ona atu implementa,” nia akresenta.

Aleinde ne’e, Oscar Lima mós husu ba MOP atu rezolve pagamentu ne’ebé atrazu tanba bele fó impaktu ba kompañia nia finaseiru.

“Ami mós husu ona ba Ministru atu projetu 142, ne’ebé projetu 45 seidauk halo pagamentu ne’e bele lori fila hodi trata nia kontratu tanba sira (empreza) halo obra tanba razaun hetan ajudikasaun direita husi Governu anteriór sira. Tanba se la’e bele fó todan ba kompañia sira,” empreza timor-oan ne’e realsa.

Antes ne’e, MOP halo ona pagamentu ba projetu ho pakote 94 ho kustu $114.295.645,69 no husi projetu emerjénsia 142, kompostu husi projetu estrada 72, kontrolu cheia ka kontrui barrajen iha mota hamutuk 22 no projetu ponte haat.

Projetu ne’ebé iha kontratu hamutuk 98, maibé projetu estrada tolu maka seidauk hatama ba kontratu dezempeñu, tanba ne’e projetu estrada ne’ebé halo ona pagamentu hamutuk 69, barrajen hamutuk 22 no ponte tolu tanba ponte ida muda ona kontratu, nune’e totál pagamentu ba projetu hamutuk 94.

Husi projetu ho pakote 142 ne’e, iha projetu 98 mak iha kontratu, maibé pakote tolu mak empreza seidauk hatama garantia dezempeñu no pakote ida asina kontratu desde 2013, maibé bainhira husu fali Konsellu Administrasaun Fundu Infraestrutura (KAFI) atu halo aprovasaun, muda husi ponte konkretu ba fali ponte de aço.

MOP no Ajénsia Dezenvolvimentu Nasionál (ADN) hala’o verfikasaun ba projetu 94, ne’ebé pakote 36 mak konstrusaun fíziku atinje ona porsentu 100 no pakote 58 hahú porsentu 4 to’o 85.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here