Atividade MAP kuda fini fehuk ropa iha Postu Administrativu Letefoho. Imajen/Mídia-MAP

DILI, 09 jullu 2020 (TATOLI) – Ministériu Agrikultura no Peska (MAP) liuhosi Diresaun Nasionál Agikultura, Ortikultura no  Estensaun, lansa kuda fini fehuk ropa iha rai ektare lima, iha Aldeia Taurema, Suku Eraulu, Postu Administrativu  Letefoho, Munisípiu Ermera, ne’ebé fonte orsamentu ba atividade ne’e maihusi Fundu COVID-19.

Bazeia ba proposta MAP prevee millaun $4,9 iha Fundu COVID-19 hodi ezekuta programa aumenta produsaun no produtividade, ne’ebé aliña ho programa no atividade ba prevensaun no metigasaun COVID-19.

Vise-Ministru Ministériu Agrikultura no Peska, Abílio Xavier de Araujo Lebo, hateten atividade ne’e hanesan meiu ida atubele ajuda povu agrikultór hosi bele hadi’a ekonomia uma-kain iha futuru.

“Ha’u haree buat ne’e presiza tebes no presiza aselera tanba povu barak maka hala’o moris hanesan agrikultór no dalaruma  ita-nia povu halerik maibé buat balun mós ita tenke haree hanesan fasilidade no oinsá maka atu halo komunikasaun entre membru Governu no povu husi loron ba loron ne’ebé dook ba bebeik, maibé agradese tanba bele rona no haree direita saida mak inan-aman sira hasoru no saida maka povu presiza no hakarak hodi halo dezenvolvimentu iha vida ekonómiku di’ak ba futuru,” tenik Vise-Ministru Abílio, iha Suku Eraulu, hanesan haktuir iha nota imprensa ne’ebé Agência Tatoli asesu iha kinta ne’e.

Tuir governante ne’e, nia parte iha devér morál ba povu agrikultura atu haree roda ekonomia povu no haree sustentabilidade moris di’ak iha futuru no haree mós ba ekonomia Minisípiu Ermera, liuliu kafé nia folin tanba durante ne’e folin tun, hanesan mós fehuk roupa no mós produtu seluk tán, tanba ne’e MAP iha planu atu normaliza folin produtu lokál iha merkadu hodi hadi’a rendimentu ekonomia komunidade Munisípiu Ermera. 

Planu prioridade iha setór Agrikultura iha Munisípiu Ermera maka aleinde kafé, MAP mós haree área agrikultura seluk hanesan ortikultura,  peska, pekuária no seluk tán hodi bele kruza importasaun ne’ebé durante ne’e ne’e tun.

“Haree katak Governu sempre hasa’e  importasaun mai iha rai-laran tanba ne’e maka ho estrutura foun presiza esforsu atu hasa’e kresimentu ekonomia rai-laran ho produsan produtu lokál,” nia subliña.

Iha fatin hanesan,  Estensionista Suku Eraulu, Agostinho de Deus, informa atividade lansamentu kuda fehuk ropa ne’e distribui ona iha Munisípiu Ermera hamutuk tonelada sanulu, ne’ebé aloka mós ba Suku Katrai-Leten, Suku Lauana, Katrai-Kraik, Suku Dukurai no Eraulu.

Xefe Grupu iha Suku Eraulu, Mario de Deus, sente kontente tanba fini fehuk ropa ne’ebé mak sira kuda ne’e hetan apoiu husi Governu liuhosi MAP hodi hadi’a moris pov agrikultór durante surtu COVID-19.

“Ami bele hasa’e produsaun fehuk ropa iha ami-nia suku no liuhosi  kuda fini ne’e ami bele hasa’e rendimentu hodi sustenta família uma-laran, maski folin fehuk ropa ladun a’as hanesan produtu seluk maibé hakarak hato’o ba nai ulun sira katak bele hasa’e presu fehuk ropa iha merkadu. Ba oin ami bele prodúz barak liután ho kualidade ne’ebé di’ak no kompañia sira bele mai sosa direita iha ami-nia fatin,’ nia subliña.

Sekretáriu Autoridade Munisípiu, António Alves da Costa enkoraja to’os-nain sira atu badinas servisu kuda nafatin fahuk ropa no ortikultura sira no tau-matan ba fini hodi nune’e bele koileta no hetan rezultadu di’ak iha futuru mai.

Nune’e mós, Grupu komunitáriu sira husi Taurema no Eratoi kontente ho aktividade ne’e no komunidade sira ne’ebé partisipa aktividade ne’e kompostu husi Suku Dukurai Aldeia Eratoi, Suku Eraulo Aldeia Taurema, Lequisala no suku viziñu sira.

Iha momentu ne’e, to’os-nain sira mós oferese sira-nia produtu lokál ba Vise-Ministru no Autoridade sira mak hanesan Liis mean no mutin, Lakeru, koto, forekeli, ervilla, kafé, papas, terigu no seluk tan.

Iha seremónia lansamentu kuda fehuk ropa ne’ebé organiza husi Servisu Munisipál Agrikultura Ermera, Grupu Ortikultura hamutuk lima maka asina akordu ho MAP hodi hetan Fundu COVID-19 atubele hetan fini fehuk ropa.

Iha programa ne’e hetan partisipasaun másimu husi Vise-Ministru Agrikultura no Peska, Diretór Ministériu Agrikultura husi Nasionál, regionál, munisipál, líder lokál sira iha Postu Administrativu Letefoho, veteranu sira, inklui komunidade iha suku Duku Rai ho Eraulu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here