Vise-Ministru Interiór, António Armindo. Imajen Tatoli/António Gonçalves

DILI, 09 jullu 2020 (TATOLI) – Vise Ministru Interiór, António Armindo, deklara lei no estatutu Polísia Nasionál Timor-Leste (PNTL) la tolera kualkér membru no ofisiál polísia atu halo juramentu ba partidu polítika no   juramentu ba grupu arte marsiál (GAM).

Notísia Relevante : Komandu PNTL Deklara Zero Toleránsia Ba Komandante Ne’ebé Jura Ba GAM

Vise Ministru António Armindo ne’ebé nomea hosi Partidu KHUNTU ne’e deklara too agora nia rasik seidauk simu keixa ruma no seidauk simu relatóriu hosi Komandu PNTL kona-ba deskonfia membru komandante PNTL balun  halo juramentu ba partidu polítiku KHUNTO no partidu polítiku seluk tan.

“PNTL iha ninia lei dixiplinár ne’ebé uluk aprova ne’e Komandu maka iha ninia papél para haree nia membru sira, tanba membru PNTL halo juramentu dala ida de’it ba Konstituisaun RDTL agora zero toleránsia ba membru ho ofisiál PNTL halo juramentu ba partidu polítiku no ba GAM,” afirma Vise Ministru Interiór, António Armindo, hodi responde jornalista sira, ohin, hafoin akompaña Primeiru-Ministru nu’udar mós Ministru Interiór, Taur Matan Ruak, halo enkontru ho ofisiais PNTL iha  Kuartél Jerál PNTL, Caicoli, Dili

António hatutan, dala ruma ema balun bele halo ajitasaun polítika hodi hafo’er komandante sira nia naran di’ak.

“Deskonfia ne’e normál, ne’e ajitasaun polítika, balun bele la gosta bobar malu, maibé nu’udar lideransa ita tau atensaun konsidera isu sira ne’e hodi haree buat hotu-hotu tuir nia dalan, nia jura ka lae, tenke haree provasaun ne’e mai hosi investigasaun,” António Armindo hateten.

Antes ne’e, Komandante Jerál PNTL, Komisáriu Faustino da Costa, deklara nia parte simu ona lista komandante PNTL balun ba halo juramentu tama ba GAM balun ne’ebé iha relasaun ho partidu polítiku ida.

Komisáriu dehan, nia parte rasik sei bolu komandante sira ne’ebé lista naran nia simu atu halo justifikasaun ba komandu.

Hosi sorin seluk, Segundu Komandante PNTL, Komisáriu, Mateus Fernandes deklara, membru PNTL hotu kumpre regra hodi halo de’it juramentu ba Konstituisaun RDTL no Bandeira RDTL.

“Ha’u fiar katak, ami nia membru 4000-resin ne’e hotu-hotu hakru’uk ba PNTL no haru’uk ba Konstituisaun RDTL, karik maka iha evidénsia ruma katak, entre ami ruma ba jura, bom depois investigasaun maka sei haree, see maka ba jura nia sei hasoru konsekuénsia tanba Konstituisaun hatete polísia ne’e jura dala ida de’it ba konstituisaun RDTL no bandeira RDTL, se balun jura dala rua signifika kontra lei dixiplinár polísia nian,” Mateus Fernandes afirma.

Nia hatutan, mezmu deputadu balun hosi Partidu KHUNTU iha Parlamentu Nasionál rejeita informasaun kona-ba pesoál PNTL sira ne’ebé ba halo juramentu, maibé parte PNTL halo ona investigasaun.

Nia hatutan, lista naran ne’ebé komandu PNTL simu ona, sei halo investigasaun maka bele deskobre loloos. Tanba lei no regulamentu dixiplinár PNTL rasik la tolera atu membru polísia halo juramentu ba partidu polítiku sira.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here