Diretora Ezekutiva Fundu Dezenvolvimentu Kapitál Umanu (FDCH), Lelia Carceres dos Santos. Imajen/Osória Marques.

DILI, 08 jullu 2020 (TATOLI)–Komisaun Funsaun Públika hamutuk (KFP) ho Institutu Nasionál Administrasaun Públika (INAP), ohin, disemina Dekretu-Lei n13/2020, 15 Abril-Regulamentu Fundu Dezenvolvimentu Kapitál Umanu ne’ebé PR promulga iha  15 abril 2020, ba kargu xefia sira iha Fundu Dezenvolvimentu Kapitál Umanu (FDCH, sigla portugés).

Notísia Relevante: FDCH Implementa Programa Estájiu Profesionál Ba Bolseiru Graduadu

Diretora Ezekutiva Fundu Dezenvolvimentu Kapitál Umanu (FDCH), Lelia Carceres dos Santos, hateten iha dekretu-lei foun ne’e iha artigu 19, 20 no 21, maibé liliu iha artigu 19 ko’alia kona-ba kompeténsia KFP ho INAP ba programa formasaun no kapasitasaun ba funsionáriu públiku sira inklui bolsu estudu.

“Ohin, ita ko’alia liu mak funsionáriu sira entaun saida mak ita halo mak ita disemina dekretu-lei ne’e, atu fó hanoin ba lina ministeriál hotu no mekanizmu ne’ebé mak atu implementa Orsamentu Jerál Estadu 2021 iha mudansa. Uluk, planu kada liña  ministeriál submete direta mai iha FDCH nian,” Diretora Ezekutivu FDCH, Lelia Carceres dos Santos, ba jornalsita sira iha Palásiu das Cinzas, Dili, kuarta ne’e.

Tuir nia, ho dekretu-lei foun ne’e nia mekanizmu muda tenke submete ba KFP no INAP. Tanba, nia dehan, bainhira iha liña ministeriál balun mak atu haruka nia funsionáriu sira atu tuir formasaun ne’e, tenke submete ba iha instituisaun rua ne’e mak bele prosesa no verifika. 

Iha prosesu verifikasaun ne’e, nia hateten, atu bele fornese dadus no bele haree ministériu sira ne’ebé hatama nia funsionáriu sira ba tuir programa ne’e para atu sira-nia naran labele dupla. 

“Liuhosi ami-nia baze dadus, ami sempre rejista iha ami-nia sistema manajementu (manajement system). Tanba, iha ne’ebá informasaun detallu tebes hanesan funsionáriu nia naran, data moris, númeru kartaun eleitorál, servisu iha ne’ebé, tuir ona formasaun iha área saida nian, ida ne’e presiza ita hatene atu nune’e labele hamosu dupla,” diretora FDCH ne’e hateten.

Tanba, nia esplika, papél KFP ho INAP mak atu bele kontrola programa implementasaun ba formasaun no bolsu estudu ne’ebé presiza duni liuhosi prosesu konkursu públiku.

Planu hotu-hotu relasiona ho formasaun no bolsu estudu ne’e, nia hateten, tenke tuir planu no tenke liuhosi KFP ho INAP tanba funsionáriu hotu-hotu iha KFP nia okos.

“Tanba sira mak na’in. Nune’e, sira mak hatene presiza kapasita sira-nia funsionáiru sira iha área saida no presiza bolsu estadu ba área saida-saida tan. Ida-ne’e mak ita bele foti desizaun,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here