Governu Japaun liuhosi nia embaixada iha Timor-Leste fó apoiu ekipamentu informátika ba Ministériu Justisa hodi haforsa servisu Diresaun Nasionál Servisu Rejistu no Notariadu (DNRSN). Imajen/Nelson de Sousa

DILI, 09 jullu 2020 (TATOLI) – Governu Japaun liuhosi nia embaixada iha Timor-Leste, ohin, fó apoiu ekipamentu informátika ba Ministériu Justisa  hodi haforsa servisu  Diresaun Nasionál Servisu Rejistu no Notariadu (DNRSN) atu halo  rejistu labarik iha munisípiu.

Ministru Justisa Manuel Cárceres da Costa simu laptop ne’ebé apoia husi Governu Japaun. Imajen/Nelson de Sousa

Apoiu ekipamentu informátika ne’e entrega diretamente hosi Embaixadór Japaun mai TL,  Masami Kinefuchi akompaña mós Adjuntu reprezentativu UNICEF iha Timor-Leste Scoot Whoolery ba Ministru Justisa Manuel Cárceres da Costa iha edifísiu Diresaun Nasionál Servisu Rejistu Notariadu (DSRN), Colmera, Dili.

Ho apoiu ne’e sei tulun liu tan Diresaun Nasionál Servisu Rejistu no Notariadu (DNRSN)  Ministériu Justisa hodi halo atendimentu rejista labarik hosi tinan 0-5 iha territóriu no sira ne’e ho tinan to’o mai 11 antes seidauk rejistu bele hetan rejistu.

Ministru Justisa, Manuel Cárceres da Costa hateten, programa rejistu moris labarik lansa iha tinan 2018 no projetu ne’e parseria ho UNICEF iha Timor-Leste mak implementa.

Nia klarifika, rejistu ofisiál governu nian ba labarik foin moris nune’e bele iha baze dadus bainhira halo planifikasaun ruma ho dadus, nune’e mós bele fó rekoñesimentu direitu nu’udar ema ne’ebé foin moris mai.

Manuel Cárceres da Costa husu funsionáriu sira atu utiliza ekipamentu hirak ne’e ho kuidadu ba nesesidade servisu nian.

Embaixadór Masami Kinefuchi kontente bele apoiu Timor-Leste liuhosi projetu ne’e no importante tebes nune’e bele identifika labarik ida-idak hodi fornese servisu sosiaís bazika hanesan saúde, edukasaun no seguransa sosiál.

Enkuantu ekipamentu informátika ne’ebé apoiu mak hanesan Sistema informasaun Jestaun Demográfika ba (SIJD) 1 ne’ebé hanesan sistema krítiku ida ne’ebé dadus rejistu sivíl, inklui halibur dadus rejistu moris, jestaun no dokumentasaun ba disponibilidade sistema rejistu moris no mós kontribui ba operasaun di’ak sistema rejistu sivíl.

Apoiu ekipamentu hirak-ne’e kompostu hosi servidór ida (1), komputadór lima (5), scanner lima (5), modem 13 no hamutuk ho servisu instalasaun ho kustu aprosimadamente US$72.000.

Serimónia entrega apoiu ekipamentu ne’e hetan mós partisipa hosi reprezentante UNICEF iha Timor-Leste, Sekretáriu Estadu Terras no Propriedade (SETP), Mario Ximenes, Diretór Jerál Servisu Rejistu Notariadu Crisogno da Costa Neto, kargu xefia notariadu no funsionária sira.

Jornalista   : Nelson de Sousa

Editór        : Francisco Simões