Komunidade sira tuur hein helaatu simu subsidiu $200 hosi Governu. Imajen/Antonio Goncalves

DILI, 09 jullu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten prosesu pagamentu ba loron datoluk, benefisiáriu hamutuk 10.880 iha Rejiaun Administrativa Espesiál Oé-Cusse Ambeno (RAEOA) simu ona subsídiu $200 hosi Governu.

Notísia Relevante: Ekipa Pagamentu Fahe Ona Osan $1.583.400 ba Uma-Kain 9.267 iha RAEOA

“Ohin ekipa pagamentu iha Rejiaun Administrativa Espesiál Oecusse Ambeno (RAEOA) ho totál uma-kain ne’ebé simu ona pagamentu 10.880, totál osan ne’ebé selu ona $2.176.000, naran iha lista benefisiáriu husi RAEOA hamutuk 20.032 no totál montante orsamentu aprovadu ba RAEOA $4.006.400,” dehan Rui Manuel Gago Exposto liuhosi konferénsia imprensa iha salaun MSSI, Caicoli, Dili, kinta ne’e. 

Bazeia ba jéneru, nia informa, benefisariu ne’ebé simu ona pagamentu to’o loron ohin (kinta, 09/07/2020) ne’e feto 17,3%, mane 82,7%, no iha totál reklamasaun hamutuk 269.

Nia haktuir, iha Sub Rejiaun Pante Macassar, totál uma-kain ne’ebé simu ona pagamentu hamutuk 7.455, totál osan ne’ebé selu ona hamutuk $1.491.000 no totál naran iha lista benefisiáriu hamutuk 11.137. 

Iha Sub Rejiaun Nitibe, totál uma-kain ne’ebé simu ona pagamentu hamutuk 2.019, totál osan ne’ebé selu ona hamutuk $403.800 no totál naran iha lista benefisiáriu hamutuk 3.503.

Iha Sub Rejiaun Oesilo, totál uma-kain ne’ebé simu ona pagamentu 1.066, totál osan ne’ebé selu ona $213.200, no totál naran iha lista benefisiáriu 3.333.

Iha Sub Rejiaun Passabe, totál uma-kain ne’ebé simu ona pagamentu hamutuk 340, totál osan ne’ebé selu ona hamutuk $68.000 no totál naran iha lista benefisiáriu hamutuk 2.059.

Jornalsta : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here