Ambulánsia. Imajen: Google

COVALIMA, 09 jullu 2020 (TATOLI)-Ekipa liña oin ka front line ba prevensaun pandemia globál COVID-19 iha Munisípiu Covalima durante ne’e falta transporte hanesan karreta atu fasilita servisu profisionál saúde iha liña oin ninian no mós tula sidadaun sira ne’ebé maka tama mai Timor-Leste liuhosi fronteira terrestre Mota-Masin no Salele.

Problema falta transporte ne’e la’ós akontese de’it iha Munisípiu Covalima maibé kazu ne’e akontese mós iha Munisípiu Bobonaro.

Notísia Relevante :Bobonaro Laiha Karreta Suporta Servisu Kuarentena

Diretór Servisu Saúde Munisípiu Covalima, Filipe Pereira Lemos, hateten nia parte presiza hetan apoiu transporte espesífiku apoiu servisu ekipa front line ninian.

“Ami-nia prekupasaun servisu front line durante ne’e maka ami laiha karreta espesífiku  ida atu bele tula ita-nia  ema  ne’ebé  tama husi fronteira atu lori mai iha kuarentena,”informa, Filipe Pereira Lemos, ba jornalista sira iha Sentru Saúde Covalima, kuarta ne’e.

Notísia Relevante :MS Observa Fatin Kuarentena no Izolamentu iha Fronteira

Durante ne’e,  nia esplika ekipa front line Suai ninian tula abitante lori ba fatin kuarentena ho karreta ambulansia multi funsaun.

Desizaun ne’e risku atu kontamina  moras coronavirus ne’e  ba ema seluk bainhira iha ona transmisaun lokál.

Aleinde ne’e, sira mós preokupa ho kondisaun infraestrutura no ekipamentu prevensaun COVID-19 iha kuarentena.

“Agora iha Suai fatin kuarentena iha maibé preokupasaun maka ekipamentu iha kuarentena  hodi simu ita-nia ema sira ne’ebé tama husi fronteira mai,  kama, bee moos,  no mós eletrisidade ne’ebé forñese mai iha kuarentena ninia kapasidade la to’o, ne’ebé kondisaun iha kuarentena ne’e ekipamentu seidauk sufisiente maibé profisionál saúde sira la’o ho di’ak,”nia hatutan.

Entretantu, iha loron 07 fulan-jullu ne’e, Vise Ministru Saúde, Bonifácio Maucoli dos Reis halo ona observasaun ba fatin kuarentena ne’ebé estabelese ona iha Batugade Postu Administrativu Balibo Munisípiu Bobonaro no Covalima hodi rezolve.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here