Klibur Estudante Progresivu (KEP) halo manifestasaun hodi presta solidariedade ba povu Papua, Indonézia. Imajen/Foti husi Facebook

DILI, 08 jullu 2020 (TATOLI) – Tribunál Distritál Dili (TDD), ohin, absolve arguidu nain-14 nu’udar manifestante ‘’Free West Papua’’ hosi krime dezobediénsia ne’ebé Ministériu Públiku imputa ba sira.

Notísia Relevante : Manifestante “Free West Papua” Submete ba Julgamentu Primeiru Interrogatóriu

Manifestante na’in-14 ne’e enfrenta justisa iha TDD hafoin kumpre detensaun iha Sela Polísia tanba halo asaun demonstrasaun hasoru Governu Indonézia iha Embaixada Repúblika Indonézia nian iha Dili hodi fó solidariedade ba luta libertasaun povu West Papua nian.

Iha leitura desizaun, Juis prosesu Ivan Suritai, hateten, bazeia ba prosesu audiénsia julgamentu sira liu ba hosi deklarasaun parte sira hanesan arguidu no sasin konjuga ho akuzasaun aktu ne’ebé aprezenta hosi Ministéiru Públiku tuir entendimentu Tribunál nian faktu balun loos no balun la loos.

Nia esplika, faktu ne’ebé loos tanba hafoin parte polísia simu informasaun kona-ba asaun manifestasaun refere ho nune’e polísia tun iha terrenu hodi to’o iha fatin hodi halo intervensaun no hapara diretamente no lori kedas manifestante sira ba detensaun oras 72 nia laran.

Faktu ne’ebé laloos, Juis Ivan Suritai hateten, polísia la halo aproximasaun iha momentu ne’ebá hodi esplika regra sira kona-ba manifestasaun nian, maibé hapara direita no lori ba detensaun.

Juis Ivan Suritai esplika, tuir artigu 244 alínea 1, kuandu arguidu sira iha momentu halo asaun refere polísia to’o husu hapara sira lakohi no kontinua, ida ne’e mak prienxe prosesu kriminál, mezmu ho asaun ne’ebé sira halo la tuir regra manifestasaun  ninian hodi uza objetu pamfletu, maibé realidade sira koopera bainhira parte polísia halo intervensaun.

Nia dehan, loloos polísia tenke esplika uluk regra sira nune’e mós fó alerta no arguidu sira la kumpre kontinua halo asaun, ida ne’e mak polísia bele halo asaun hodi detein.

Ho razaun fundamentu hirak ne’e Tribunál entende la prienxe prosesu kriminál, nune’e absolve arguidu sira hotu hosi krime dezobediénsia iha artigu 244 númeru 1 alínea a, ne’ebé antes MP imputa ba sira.

Ho desizaun Tribunál nian ne’e parte Ministériu Públiku la konkorda bele halo rekursu durante loron 15 (sura hosi loron akórdaun Tribunál nian).

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here