Komandante TLPDP, Superintendent Darren Booy entrega xave ba Komandante Centro Formasaun Polísia, Superintendente Arqumino Ramos antes inaugura sentru Auditóriu CFP iha Akademia Polísia, Comoro, Dili, kuarta (08/07/2020). Imajen/Eugénio Pereira

DILI, 08 jullu 2020 (TATOLI)- Governu Austrália liuhosi Timor-Leste Police Development Partners (TLPDP), ohin, hamutuk ho Komandu Polísia Nasionál Timor-Leste (PNTL) hala’o inaugurasaun ba Auditóriu Centro Formasaun Polísia (CFP) iha Akademia Comoro, Dili.

Serimónia inaugurasaun hala’o hosi Komandante TLPDP, Superintendent Darren Booy no Komandante CFP Superintendente Xefe Arqumino Ramos, akompaña hosi Segundu Komandante PNTL, Komisáriu PMateus Fernandes no Embaixadór Austrália mai Timor-Leste, Peter Robert.

Embaixadór Austrália ba Timor-Leste, Peter Robert dehan, Governu Austrália iha kometimentu servisu hamutuk ho Governu TL no ajuda PNTL.

“Parabéns ba PNTL, TLPDP, ha’u fiar katak, kooperasaun servisu ne’e sei metin liután importante ba Timor-Leste no Austrália,” hateten Embaixadór Peter Robert.

Diplomata ne’e dehan, iha área seguransa nian, Austrália nafatin iha kometimentu apoiu infraestrutura no kapasita rekursu umanu membru PNTL atu servisu ho profisionál.

Iha fatin hanesan, Komandante TLPDP, Superintendent Darren Booy hato’o agradese bele servisu hamutuk ho PNTL konstrui sentru formasaun ne’e too remata hodi uza ba fatin diálogu no konferénsia sira.

TLPDP orgullu bele apoiu fundus ajuda dezenvolvimentu PNTL nian hodi harii fatin auditóriu hodi fasilita membru PNTL uza fatin ne’e hala’o formasaun hasa’e sira nia rekursu umanu.

“TLPDP kontinua sai parseiru ba PNTL atu suporta formasaun ba PNTL iha área oin-oin,” nia hateten hodi promete katak TLPDP kontinua suporta nafatin formasaun no kursu oin-oin ne’ebé liga ba servisu PNTL nian.

Segundu Komandante PNTL, Komisáriu Mateus Fernandes, lori Komandu PNTL nia naran hato’o agradese ba parseiru TLPDP nia apoiu hodi  dezenvolve infraestrutura PNTL nian.

“PNTL agradese boot ba ita nia belun TLPDP liuhosi Embaixadór Austrália mai entrega auditóriu ne’e ba ita. PNTL hamriik tinan 20 ona, ita foin hetan auditóriu ida ho fasilidade kompletu,” Komisáriu Mateus hateten.

Nia hatutan, TLPD durante ne’e la’ós fó de’it apoiu ne’e, maibé harii mós sentru treinamentu ba PNTL iha munisípiu 12, inklui Rejiaun Administrativu Espesial Oe-Cusse Ambeno (RAEOA) no ajuda mós PNTL hodi harii edifísiu Sentru Investigasaun Kriminál ne’ebé sei hala’o hela konstrusaun.

Lori naran Komandu PNTL, Mateus hato’o agradese ba Governu Austrália no TLPDP nia ajuda hodi kontinua servisu hamutuk dezenvolve PNTL.

“Ami sente kontente tebes, tanba TLPDP kontinua asiste ami hodi dezenvolve rekursu umanu,” nia hateten.

Komandante CFP Superintendente Arqumino Ramos, apresia tebes foin primeira vés PNTL hetan apoiu auditóriu ida konstrui ho fasilidade kompletu.

Nia dehan, auditóriu ne’e bele halibur ema 250 hodi partisipa serimónia ka konferénsia internasionál ruma bele uza auditóriu ne’e.

Arqumino Ramos hatutan, ba oin PNTL bele uza fatin ne’e hodi halo kursu ka formasaun  oin-oin hodi kontribui ba dezenvolvimentu PNTL.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here