Vítima violénsia seksuál no violénsia doméstika. Imajen/foti hosi Google

DILI, 08 jullu 2020 (TATOLI) – Taksista ida ho inisiál ZAB, ohin, tenke tuur iha kadeira Tribunál Distritál Dili  (TDD) nian hanesan arguidu hodi responsabiliza ba nia hahalok ne’ebé tenta halo violasaun seksuál hasoru inan-feton ida ho inisiál ECD.

Tuir akuzasaun Ministériu Públiku nian, iha loron 03 Fevereiru 2014, tuku 10:30 Otl,  inan-feton ECD ne’ebé MP notifika hanesan lezada hein hela karreta besik iha edifísiu Ministériu Justisa nia oin, atu fila ba nia uma iha Bebonuk, Dili.

Teki-teki de’it, arguidu ZAB lori nia taxi ba para iha lezada nia oin, atu tula lezada tanba arguidu dehan nia koñese lezada no altura ne’ebá lezada rekuza tanba lezada la koñese arguidu, maibé arguidu ezije nafatin, ho nune’e lezada konsege sa’e taxi ne’e.

Bainhira tula tiha lezada arguidu liuhosi area Praia dos Coqueiros nian no  arguidu la lori lezada ba nia uma, mas tama fali iha dalan Timor Plaza nia kotuk, iha hudi-laran ida, arguidu haree ba mai ema la iha, ho nune’e, para karreta iha fatin refere.

Arguidu kaer lezada nia liman hodi dehan ba lezada katak nia gosta lezada, no husu atu halo relasaun, maibé lezada rekuza. Hafoin ne’e, arguidu kontinua tula lezada ba area Kampu Tuti nian no to’o ba iha lezada nia uma, arguidu lapara taxi, mas lezada koko loke odamatan atu halai, maibé arguidu dada tiha nia liman no hadau tiha lezada nia pasta.  Arguidu ko’alia ba lezada katak ba maka tun iha sorin.

Mezmu nune’e momentu ne’ebá arguidu kontinua tula lezada lori ba iha tasi ibun, Tasi Tolu nian. Lezada ta’uk no buka maneira atu halai, maibé arguidu ameasa ho tudik ida atu oho, nune’e momentu ne’ebá iha mane ida hamriik hela no lezada husu ajuda loke odamatan hodi ba keixa iha polísia.

Liuhosi audiénsia julgamentu ne’e, Ministériu Públiku akuza arguidu hanesan autór materiál ba forma konsumada ho krime koasaun seksuál previstu iha artigu 171 kódigu Penál Timor-Leste, ne’ebé hateten, se maka obriga ema seluk sofre ka pratika ho nia ka ho ema seluk, aktu seksuál relevante, ho violénsia, ameasa grave, ka ba fim ida ne’e, halo uluk tiha ema ne’e lakon konsiénsia ka labele reziste, sei hetan pena prizaun tinan-rua (2) to’o  tinan-ualu (8).

Audiénsia julgamentu ne’e prezide hosi juiz João Ribeiro, Zulmira Auxiladora, Argentino Nunes, MP reprezenta hosi Prokuradór Jacinto Babo, no arguidu hetan asisténsia legal hosi advogadu privadu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here