Sekretariu Estadu Komunikasaun Sosial halao enkontru ho Diretor Arte Moris ho nia grupo iha Palacio Governu.Imajen/Jogerjo Guterres

DILI, 08 jullu 2020 (TATOLI) – Sekretáriu Estadu Komunikasaun Sosiál (SECOMS sigla portugés), Merício Juvinal dos Reis “Akara”, promete sei fasilita mediasaun entre Grupu Arte Moris ho Sekretáriu Estadu Arte no Kultura nomós veteranu sira hodi buka solusaun ba edifísiu Arte Moris ne’ebé tuir planu Governu sei entrega ba veteranu sira mak uza.

“Ha’u promete ba ita bo’ot sira semana ne’e sei realiza mediasaun ruma entre ita bo’ot sira ho SEAK no veteranu atu nune’e bele hetan solusaun di’ak ba polémika ne’e”, dehan Akara hafoin halo enkontru ho Ekipa Arte Moris, iha Palásiu Governu, ohin.

Notísia Relevante :Governu Planea Oferese Eis Casa Europeia ba Arte Moris

Governante ne’e rekoñese ezisténsia Arte Moris ninian tanba fó mós kontribuisaun hodi promove arte iha Timor-Leste ba mundu.

“Ha’u kompriende tebes kona-ba lala’ok arte nian, tan ne’e ha’u preokupa ninia ezisténsia, maibé dala ruma ema seluk la kompriende saida mak arte tanba  ne’e la dun tau importansia. Maibé problema saida mak grupu arte moris enfrenta sai preokupasaun ha’u nian mós, tanba ne’e ha’u promete sai mediadór hodi buka solusaun”, hatutan.

Iliwatu Danabere,Diretor Arte Moris.Imajen/Jogerjo Guterres

Iha tempu hanesan Diretór Arte Moris, Iliwatu Damabere, hateten orgullu ho promesa husi SECOMS tanba ajuda atu buka solusaun ba kestaun ne’e.

“Ami hein promesa SECOMS nian atu nune’e ami labele moris iha ambiente ida inserteza iha situasaun ida agora ne’e, tanba haree fali ba kotuk ezisténsia Arte Moris nian tinan 17 dezde 2003 to’o ohin loron”, dehan Iliwatu.

Nia esplika iha Grupu Arte Moris nia laran eziste mós grupu seluk hanesan TERTIL, Galaxy Band, Banda Klamar, Naran La’ek hodi kontinua promove arte no talentu foinsa’e Timor-oan sira to’o ohin loron.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here