Paizajen iha área Cristo Rei. Imajen/Espesiál

DILI, 08 jullu 2020 (TATOLI) Ministériu Turizmu Komunitáriu no Kulturál (MTKK) no Sekretaria Estadu Komunikasaun Sosiál (SEKOMS) hakarak halo servisu koordenasaun ba asuntu dezenvolvimentu fatin turístiku iha Timor-Leste liuhosi promosaun publisidade atu jere fatin turístiku sira seguru ba turista sira tantu rai-laran no mós husi rai-li’ur.

Informasaun ne’e fó sai bainhira Vise-Ministra Turizmu Komunitáriu no Kulturál Inácia da Conceição Teixeira hala’o enkontru informál ho Sekretaria Estadu Komunikasaun Sosiál, Merício Juvinal dos Reis ‘Akara’,  iha salaun enkontru Memorial Hall, Farol, foin lalais ne’e.

Vise-Ministra Inácia hateten enkontru ne’e atu haree ba servisu koordenasaun entre ministériu rua ne’e, liuliu atu halo kampaña publisidade kona-ba kestaun seguransa ba turizta iha fatin turístiku sira iha Díli laran hanesan iha Cristo-Rei no Tasi-Tolu atu nune’e vizitante sira bele lao ho seguru no atu halo perfíl ba suku sira ne’ebé iha poténsia ba fatin turístiku iha munisípiu 12 inklui Rejiaun Administrativa Espesiál Oé-cusse Ambeno (RAEOA), liuliu ba suku sira ne’ebé maka iha poténsia turístiku.

“Bainhira ita ko’alia kona-ba potensialidade fatin turístiku iha Timor-Leste ita iha fatin ne’ebé interesante tebes tanba ne’e presiza halo planu no programa konkretu atubele dezenvolve pur faze ba fatin hirak ne’e,’ tenik governante ne’e.

Ba kestaun ne’e, Sekretáriu Estadu Akara dehan nia parte sei ko’alia ho mídia sira atu nune’e halo publikasaun kada loron kona-ba atendimentu públiku no sei prodúz mós publisidade ba transporte públiku sira hodi garante seguransa ba pasajeiru sira no bele ajuda mós motorizta sira hodi hatene kona-ba protokulu tula turista sira.

“Ami sei serbisu hamutuk ho Vise-Ministra Turizmu Komunitáriu no Kulutrál atu kolabora maka’as ba publisidade ba púliku kona-ba seguransa iha fatin turístika sira no sei prodúz hamutuk konseitu ne’ebé sei dezenvolve no koordena ho mídia sira atu halo publikasaun kada loron,” nia realsa.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here